Əhməd Şirkərim kamançanı köklədi, həmişəki kimi, gözlərini yumdu və
əvvəlcə bir «Segah» çaldı və o «Segah»ı o qədər ürəkdən çaldı ki, o «Segah»
Moskvadakı o mehmanxana nömrəsində o qədər sirli, gözlənilməz, eyni zamanda,
məhrəmanə səsləndi ki, kamançanı sevməyən, muğamatı da başa düşməyən Vasili
ilə Roza da, doğrusu, bu çalğıdan həzz aldılar. Sonra Əhməd Şirkərim Azərbaycan
xalq mahnılarını, oyun havalarını çaldı, təzədən muğamata qayıtdı, sonra Əbdül
Qafarzadənin xahişi ilə «Sarı bülbül» çaldı; bu mahnını rəhmətlik Xıdır çox
xoşlayırdı və indiki kimi Əbdül Qafarzadənin yadında idi: Xıdır qışın soyuğunda da
həyətlərindəki krantdan axan buz kimi suyun altında yuyuna-yuyuna «Sarı bülbül»ü
oxuyurdu – «Sarı bülbül» həmənki «Sarı bülbül» idi, Xıdır isə çoxdan haqq
dünyasında idi və elə bil ki, Əhməd Şirkərim də bundan xəbərdar idi, Əbdül
Qafarzadənin ürəyini sızıldadan bu xatirələri kamançanın diliylə söyləyirdi – Əbdül
Qafarzadənin gözləri yaşardı; axırda «Kəsmə şikəstə» çaldı və Əhməd Şirkərim
gözlərini yumub kamanın simlər üstündəki get-gəli ilə həmahəng başını yırğalayayırğalaya
o «Kəsmə şikəstə»ni çaldlqca Əbdül Qafarzadəyə elə gəlirdi ki,
kamançanın bu səsiylə, «Kəsmə şikəstə»nin bu sədaları ilə Rozanın o iri qara
gözləri, o ağappaq tarım bədəni arasında bir doğmalıq var; bu doğmalıq qan
doğmalığı deyildi, vaxt, zaman doğmalığıydı, dünyanın qədim çağlarından, tarixin
səsçatmazlığından, ünyetməzliyindən xəbər verirdi və Əbdül Qafarzadə də gözlərini
yumub kamançanı dinləyə-dinləyə o qədimlərə, o səsçatmaz ünyetməzliyə getmişdi.
Əhməd Şirkərim «Kəsmə şikəstə»ni çalıb qurtarandan sonra, o mehmanxana
nömrəsinə qəribə bir sükut çökdü və bu sükutun özündə də bir qədimlik var idi;
sonra Əbdül Qafarzadə əlini pencəyinin döş cibinə saldı. Timsah dərisindən tikilmiş
və az qala otuz ildən bəri cibində gəzdirdiyi iri portmanesini çıxartdı və Əhməd
Şirkərimin qabağına on dənə yüzlük sayıb:
– Halal olsun, – dedi.
Vasili özündən razı halda Əhməd Şirkərimə baxdı və başını tərpətdi, yəni ki,
gördün də...
O şax yüzlüklərdən, Əbdül Qafarzadənin musiqini beləcə
qiymətləndirməsindən vəcdə gəlmiş Əhməd Şirkərim ayağa qalxdı, kamança ilə
birlikdə Bakıdan gətirdiyi skripkasını qoburdan çıxartdı, gəlib Rozanın qarşısında
dayandı və yenə də gözlərini yumub Rozaya ithaf etdiyi «Oçi çernıe» çaldı...
O gecə çarpayıda Əbdül Qafarzadənin böyrünə qısılıb yuxuya gedən Roza o
üçotaqlı lüks nömrənin sakitliyi və qaranlğı içində kişinin ürəyinin döyüntüsünü
aydınca eşidirdi və o döyüntüdə heç vaxt duymadığı bir doğmalıq duyurdu; həmin
anlarda Rozaya elə gəlirdi ki, bu yekə və tüklü qarınlı, yaşlı kişini, həqiqətən,
ürəkdən sevməyə başlayıb, hətta o yad, eyni zamanda, birdən-birə bu dərəcədə
doğma olmuş kamança da, elə bil, təzədən harada isə həzin-həzin çalmağa başladı, o
çalğının uzaq səsi sakitlik içindən süzülüb gəldi. Roza yuxuya gedə-gedə elə
təsəvvür etdi ki, bura mehmanxana nömrəsi yox, öz evidi, yanında uzanmış bu kişi
də onun əridi; Roza bir ər-arvadlıq doğmalığı, ailə mehribanlığı hiss etdi və tamam
yuxuya getməzdən əvvəl Əbdül Qafarzadənin tüklü sinəsini yüngülcə tumarladı.
Bakıda, Səkkizinci kilometrdə Rozanın işlədiyi əmanət kassası ilə üzbəüz
köhnə üçmərtəbəli binanın üçüncü mərtəbəsində, küçə pəncərələrinin yuxarısı ilə
damın arasında daşdan belə bir yazı yonulmuşdu:
1867.
MƏŞƏDI MIRZƏ MIR ABDULLA
MƏŞƏDI MIR MƏMMƏDHÜSEYN OĞLU
Və əmanət kassasının pəncərəsindən o yazıya baxanda həmişə Rozaya elə
gəlirdi ki, o rəqəmin qədimliyi, Məşədi Mirzə ömrünün həmin uzaqlığı müqabilində
özünün, yəni Rozanın yaşadığı həyat, keçirdiyi hiss-həyəcanlar bir uşaq oyunudur.
Indi o üçotaqlı lüks nömrədə yuxuya getməzdən əvvəl Əbdül Qafarzadənin tüklü
sinəsini yüngülcə tumarladıqca Roza elə bilirdi ki, çarpayıda yox, o qədimliyin
içindədi, bu etibarsız dünyada yalnız o qədimliyə etibar etmək, arxalanmaq olar və
belə bir etibar hissi, arxayınçılıq duyğusu o cavan qadının bütün bədəninə bir
sakitlik, rahatlıq gətirirdi...
Amma elə həmin gecə telefon zəng çaldı və telefonun səsindən Əbdül
Qafarzadə başa düşdü ki, zəng Bakıdandır, Bakıda nəsə olub; bura gəldiyi birinci
gün Bakıya zəng eləyib, hər ehtimala qarşı, nömrəsini Qaratelə vermişdi (başqa
şəhərlərdə olanda həmişə belə edirdi); tələsik yerindən qalxıb telefonun dəstəyini
götürdü.
Danışan Ömər idi.
– Zdravstvuyte, dyadya Abdul. Eto Omar qovorit. Necəsiz?
– Nə olub?
– Çto?
– Nə olub, soruşuram.
– Mama xəstələnib, dyadya Abdul.
Əbdül Qafarzadə elə başa düşdü ki, söhbət Ömərin öz anasından, yəni Mürşüd
Gülcahaninin arvadından gedir və ürəyi sakit oldu, rahat nəfəs aldı.
– Ciddidi vəziyyəti?
– Çto?
– Soruşuram ciddidi vəziyyəti, ağırdı?
– Hə, ağırdı.
– Balam, sənin anan yazıq, sağlam adamıydı...
– Mənim anam yox e, dyadya Abdul, Qaratel mama xəstələnib. Biz də
gəlmişik bura. Sizin kvartiradan danışırıq. Sevil skazala, çtob ya pozvonil vam, a to
ya ne bespokoil bı vas. Ona oçen boitsya...
Əbdül Qafarzadənin birdən-birə bir uşaq kimi, bütün bədəni uçunmağa başladı
(Orduxanın ölümü onu qəfil ölümlərdən beləcə qorxutmuşdu...), nə qədər çalışdısa
da özünü ələ alsın, mümkün olmadı və daha heç nə soruşmayıb, dəstəyi aparatın
üstünə atdı. O Roza xoşbəxtliyi də, Moskvadakı bu altı gündə bütün içini bürümüş o
yaz təravəti də bircə anın içində çıxıb getdi işinin dalınca; Əbdül Qafarzadə tələsik
soyuq su ilə əl-üzünü yuyub geyinməyə başladı.
Yuxudan oyanmış Roza əlini qaldırıb başının üstündəki branı yandırdı və
qalxıb çarpayıda oturdu, adyal sinəsindən sürüşüb baldırlarının üstünə düşdü və indi
Rozanın branın işığında görünən döşləri də adi qadın döşləri idi...
– Çto sluçilos?
– Mən gedəsi oldum, Roza...
– Hara?
– Bakıya.
– Bəs mən?
– Sən nə qədər istəyirsən, gəz-dolan burda. Get, nədi, deyirdin o kişinin adı?
Hə, Asatur, get onu gör... Vasya da burda qalacaq, haçan istəsən, səni Bakıya
gətirəcək.
Əbdül Qafarzadə pencəyini geyinə-geyinə özü zəng eləyib Vasilini yuxudan
durquzdu, tapşırdı ki, aşağı düşüb mehmanxananın birinci mərtəbəsində onu
gözləsin, sonra əlini pencəyinin döş cibinə saldı, timsah dərili o yekə portmaneni
cibindən çıxartdı, üç min manat pul götürüb televizorun üstünə qoydu və hələ də
yuxulu gözləri ilə ona baxan Rozaya dedi:
– Bu sənindi.
Roza gözlərini qıyıb diqqətlə Əbdül Qafarzadəyə baxdı:
– Nə?
– Bu pul sənindi.
Bayaqdan bəri susub heç nə deməyən Roza birdən-birə pişik kimi yerindən
sıçradı, televizorun qabağına atıldı və o üç min manat pulu televizorun üstündən
qapıb yerə çırpdı:
– Mən kiməm bəyəm səninçün? Mənə pul verirsən? Za usluqu?..
Əbdül Qafarzadə elə həmin gecə Bakıya uçdu.
Əlbəttə, Rozaya aldığı su samuru xəzindən şubanın, qızıl bilərziyin, mirvari
boyunbağının, brilyant üzük və sırğa komplektinin, iyirmi dörd nəfərlik yapon
servizinin müqabilində üç min manat pul bir heç idi, amma Rozanın o gecəki
hərəkəti, «Mən kiməm bəyəm səninçün? Mənə pul verirsən?» – sözləri Əbdül
Qafarzadənin o qədər xoşuna gəlmişdi ki, o vaxtdan bir daha Roza ilə yaxınlıq
eləməsələr də (Əbdül Qafarzadə təkrarı xoşlamırdı), yayda onu Vasilinin vasitəçiliyi
ilə Xalq Təsərrüfatı Institutunun qiyabi şöbəsinə qəbul elətdirdi ki, gələcəkdə
ixtisaslı iqtisadçı olsun; ümumiyyətlə, o gözəl, o unudulmaz Moskva yazından sonra
Əbdül Qafarzadə tez-tez Roza barədə fikirləşirdi, sidq-ürəkdən bu cavan qadının
xoşbəxt olmağını istəyirdi, istəmirdi ki, Roza gələcəkdə daha artıq pozulsun, pis
əllərə düşsün, hətta fikirləşirdi ki, bəlkə Rozanı Vasiliyə alsın; amma hələ qəti
qərara gəlməmişdi.
O üç min manat isə eləcə o lüks nömrənin döşəməsinə səpilib qaldı və Əbdül
Qafarzadə çıxıb gedəndən sonra Roza, əlbəttə, o şax yüzlikləri bir-bir yerdən yığıb
götürməli oldu...
12
GÖRÜŞ
Xosrov müəllim həyatda heç vaxt Kələntər müəllimin qızlarını görməmişdi,
amma əvvəllər tez-tez, get-gedə gec-gec, hətta indinin özündə – əsrin təqvimi
səksəni adlayandan sonra da hərdənbir o qızları yuxuda görürdü. O qızların sifəti
yox idi, daha doğrusu, elə bil ki, sifətləri iki-üçqat tül arxasında idi, amma Xosrov
müəllim yuxuda bilirdi ki, bu qızlar Kələntər müəllimin qızlarıdı və Kələntər
müəllimin o qızları bir ucdan ağlayırdılar, gözlərindən axan su sel kimi, küçələrdən
keçirdi, bir dəniz əmələ gətirirdi və Xosrov müəllim yuxuda qorxurdu ki, o dənizdə
boğulub ölər. Kimsə, çox güman ki, Kələntər müəllimin arvadı idi– aradan keçən bu
uzun illər ərzində Xosrov müəllim o arvadın sifətini yadından çıxarmışdı – tez-tez o
qızlara da, Kələntər müəllimə də bütün bunları yuxuda görən (və yuxuda da bilən ki,
bunlar yuxudur...) Xosrov müəllimə də toxtaqlıq verirdi: «– Su aydınlıqdı... Su
aydınlıqdı...»
Düzdü, Xosrov müəllim bilirdi ki, bütün bunlar yuxudu, amma bunu bilə-bilə
də o dənizdə batmaqdan qorxurdu, Kələntər müəllim isə balaca bir qayıqda oturub o
dənizdə üzürdü: «– Əşşi, mənim işim əladır, – deyirdi. – Çünki əvvəldən baxtım
gətirib, yeddi qız atası olanda nə olar? Bizim arvad yarımca kilo ətdən o qədər
çoxlu, özü də dadlı xörək bişirir ki, yeyib qurtara bilmirik. Heç nədən bir şey bişirir.
Qarın da ki, tox oldu, vəssalam. Deməli, işlər əladır. Deməli, kimyanı da uşaqlara
yaxşı öyrədəcəksən». Və Kələntər müəllim gülürdü, amma Xosrov müəllim bilirdi
ki, əslində bu, gülmək deyil, ağlamaqdı, çünki Kələntər müəllimin də gözlərindən
axan yaş o qayığı doldururdu, o qayıq yox olurdu, Kələntər müəllim də yox olurdu
və Xosrov müəllim bilirdi ki, Kələntər müəllim batdı o dənizdə, sonra yenə də
qorxurdu ki, özü də batar və o qızlar da elə hey ağlayırdı, o dənizin də suyu çoxalıb
doğrudan-doğruya adamı boğurdu...
Onda Arzu Xosrov müəllimə demişdi: «– Əşşi, mənə nə vardı e, tək
canımıydı... Kələntər müəllimin isə, yazığın yeddi qızı qalmışdı...»
Və Arzu o sözləri deyəndən sonra, Xosrov müəllim bir müddət harada dilənçi,
səfil arvad görürdü, elə bilirdi ki, Kələntər müəllimin qızlarıdı, heç cürə özü ilə
bacara bilmirdi, dayanıb o dilənçi, o səfil arvada baxırdı, o arvadla Kələntər müəllim
arasında bir oxşarlıq tapmaq istəyirdi və o qədər baxırdı ki, dilənçi qorxub qaçırdı...
Xosrov müəllimin yuxuda gördüyü qızların sayı çox olurdu, amma o qızların
sayı nə qədər çox olsaydı da, onlar Kələntər müəllimin o yeddi qızı idi, Xosrov
müəllimin həyatda heç üzlərini də görmədiyi o qızlar idi.
Onda yetmişinci illərin sonu idi və Xədicə arvad düz deyirdi: Xosrov müəllim
uzun ömründə birinci dəfə (və belə görünür ki, sonuncu dəfə...) yayda istirahət
eləməyə getdi, avqust ayı idi, Bakının isti vaxtlarıydı, Xosrov müəllim poçtdan
məzuniyyət pulunu aldı (köşkdə işlədiyinin sonuncu ili idi, sonra təqaüdə çıxdı),
illərdən bəri yığdığı iki yüz manatın üstünə qoydu və «Bakı – Kislovodsk» qatarında
ümumi vaqona bilet alıb axşamçağı Bakıdan çıxdı.
Xosrov müəllim sonuncu dəfə qatara 1956-cı ildə Tomsk vilayətindən Bakıya
qayıdanda minmişdi, günlərlə beləcə bir ümumi vaqonun pəncərəsi qarşısında
oturub bir-birini əvəz edən yol mənzərələrinə baxmışdı, amma, əslində, o
mənzərələrin heç birini görməmişdi, Ovanesin Şuşaya qalxan faytonunu görmüşdü,
– o rəngbərəng ölü xoruzu görmüşdü. Hadruta aparan yolu kəsmiş yolbəndin
yanında dayanan Qırmızı Yaqubu görmüşdü, Hadrutun altı kilometrliyində yanan o
tonqala baxmışdı, səbrlə, tələsmədən Xıdır müəllimin (onda hələ Xıdır müəllimin on
yeddi il əvvəl– 1939-cu ilin həmin qış günlərindən birində güllələndiyini bilmirdi,
bunu Bakıya gələndən sonra öyrəndi...) sifətinə baxmışdı, o sifətin bütün cizgilərini
bir-bir gözlərinin qabağından keçirmişdi, yenə də Xıdır müəllimi tanımaq, başa
düşmək istəmişdi və hərdən ona elə gəlmişdi ki, Xıdır müəllim Xıdır müəllim yox,
müstəntiq Məmmədağa Ələkbərovdu, çünki on yeddi illik ayrılıqdan sonra Bakıya
gedən o qatarda, o ümumi vaqonun pəncərəsindən baxa-baxa Xıdır müəllim
haqqında fikirləşəndə birdən-birə müstəntiq Məmmədağa Ələkbərovun sifəti gəlib
qonurdu şüşəyə...
Tomsk vilayətindən gələn o qatar da, o ümumi vaqonun pəncərəsi qarşısında
oturduğu günlər də keçmişdə qalmışdı və illər bir-birini əvəz etdikcə Hadrutun altı
kilometrliyində qalanmış o tonqal da, Ələsgər müəllimin evindəki o qonaqlıq da,
Narımın o soyuğu da – hər şey bir-birinə qarışırdı, bir kütlə əmələ gətirirdi və bəzən
elə olurdu ki, o kütlə sıxılırdı, sıxılırdı, sıxılırdı, bir qoz boyda olub Xosrov
müəllimin boğazında ilişib qalırdı və o cür vaxtlarda kişiyə elə gəlirdi ki, indicə
ürəyi partlayacaq, indicə öləcək, amma ölmürdü, ürəyi partlamırdı və belə məlum
olurdu ki, dünya yaşadıqca elə Xosrov müəllim də yaşayacaqdı...
Həmin avqust axşamı Xosrov müəllim Kislovodska gedən qatarın ümumi
vaqonuna qalxdı, bileti bələdçiyə göstərib yerini soruşmaq istədi, amma çox kök,
yaşlı bir qadın olan bələdçi öz kupesində oturub o cırhacır bürküdə yekə bir duzlu
xiyarı əlinə alıb xırçaxırç yeyə-yeyə köhnə bir kitab oxuyurdu və heç başını da
qaldırmadan:
– Davay... Davay... – deyirdi. – Proxodi...
Xosrov müəllim vaqonun içinə keçib yerini tapdı (yenə pəncərənin kənarında
idi), balaca əl çamadanını taxta oturacağın altına qoydu və ümumi vaqonun cürbəcür
iylər qarışmış ağır və həddən artıq isti havasıyla nəfəs ala-ala fikirləşdi ki, bu bələdçi
qadını hardan tanıyır? Və elə ki, qatar yola düşdü, elə ki, bir az keçəndən sonra o
kök bələdçi qadın sağ əlini şəhadət barmağının uzun dırnağı ilə dişlərinin arasında
qalmış duzlu xiyar qırıntılarını təmizləyə-təmizləyə, sərnişinlərin biletlərini yoxlayayoxlaya
gəlib Xosrov müəllimin qabağında dayandı, kişi lap əmin oldu ki, bu qadını
hardansa yaxşı tanıyır, amma kim olduğunu heç cürə yadına sala bilmirdi.
Bələdçi qadın bütün vaqon eşitsin deyə bərkdən:
– Tualeti təmiz saxlayın!– qışqırdı. – Kim tualetdə biyabırçılıq eləsə, əsgini
verəcəyəm əlinə, özünə yudurdaciyəm!– Sonra dırnağı ilə dişlərini qurdaladığı əlini
Xosrov müəllimə tərəf uzatdı. – Davay tez elə! Bileti ver görüm!
Xosrov müəllim əlində hazır tutduğu bileti bələdçi qadına uzatdı, amma o
bələdçi qadın bileti götürmək əvəzinə, sürətlə gedən vaqonun işığında diqqətlə
Xosrov müəllimə baxdı və birdən:
– A-a-a... Xosrov məllimsən sən? – soruşdu, gözləri əməlli-başlı bir maraqla
işıldadı. – A kişi, bəs, səni güllələməyiblər?! Hardan xortdamısan sən belə?.. Niçeqo
sebe!..
Xosrov müəllim bilirdi ki, bu qadını yaxşı tanıyır, lap yaxından tanıyır, amma
kim olduğunu heç cürə yadına sala bilmirdi, amma içindən nəsə pis, bəd bir hiss
əvvəlcədən baş qaldırmağa başladı, o ümumi vaqonun tər qoxusuna, soyutma
yumurta, kolbasa, soğan, sarımsaq qoxusuna qarışıb az qaldı kişinin ürəyini
bulandırsın.
Bələdçi qadın Xosrov müəllimin biletini alıb baxdı:
– Fiktivni döyül ki?.. – deyib bərkdən güldü və soruşdu: – Məni tanımadın?
Xosrov müəllim bu kök, adda-budda ağarmış saçları sir-sifətinə tökülmüş,
güləndə dodağının kənarlarından əprimiş metal dişləri görünən qadına baxırdı... bu
qadını, əlbəttə, tanıyırdı... bilirdi ki, bu qadın kimdir... bilirdi... amma kim idi bu
qadın?.. və o pis, o bəd hiss gəlib yenə də Xosrov müəllimin boğazına dirənmişdi və
kişi udqunduqca nazik boğazının uzun hülqumu eləcə enib-qalxırdı.
Bələdçi qadın:
– Mənəm də!.. – dedi. – Tanımadın?.. Arzuyəm də, Ələsgər müəllimin qızı!..
Xosrov müəllim eləcə udqunurdu və heç nə demirdi, kişinin alnından süzülən
tər gəlib burnunun ucundan sallanırdı, sonra dizinə düşüb parusin şalvarının
balağına yaş ləkə salırdı.
Bələdçi qadın (Arzu!) yenə də güldü:
– Elə əvvəlki kimi danışıb-eləyən döyülsən, hə?..Vay səni!.. Mən elə bilirdim,
çoxdan güllələyiblər səni, indi sümüylərin də çürüyüb!.. Ancaq, yaxşı qalmısan
vallah!.. – Və bu kök bələdçi qadın da susdu, birdən-birə nəsə çox uzaqlara getdi,
sonra dedi:– Je vu felisit, madmuazel... Yaduva gəlir?..
Qəribə idi, hər şey Xosrov müəllimin yadında idi və eyni zamanda, heç nəyi
xatırlamırdı, beynində, hisslərində hər şey bir-birinə qarışmışdı və o qarışıqlıq içində
ən gözlənilməzi bu idi ki, Xosrov müəllim haradansa uzaqlardan yenicə doğulmuş
bir çağanın cığırtısını eşidirdi... Kim idi o çağa? Cəfər idi? Aslan idi? Azər idi?
Yoxsa elə bu Arzu idi? Kim idi?..
O çağa isə çığırırdı...
Bu vaxt vaqonun işığı söndü və sərnişinlər hay-küy saldı:
– Sapojnik!..
– Atanda!..
– Əlivi çək!..
– Pojarnı!..
Və o hay-küy içində o bələdçi qadının (Arzunun!) bu vaqonun əsl sahibi kimi,
amiranə və xırıltılı səsi eşidildi:
– Oğurluq eləməyin a!.. Milsianer qonşu vaqondadı!
Sonra işıq da yandı, səs-küy də kəsildi, sərnişinlər oturduqları yerdə yavaşyavaş
yatmağa başladı, sonra qatar Dərbənd stansiyasından keçdi və əlbəttə, hərgah
Gülzar sağıydısa, heç ağlına da gəlməzdi ki, o gecə vaxtı, Xosrov müəllim
Dərbənddən keçən o qatarın apardığı sərnişinlərin arasındadı...
Sonra gecənin bir aləmi o bələdçi qadın (Arzu!..) yenə də gəlib dayandı
Xosrov müəllimin qabağında və iri döşlərinin lifçiyinin kənarları görünən açıq
sinəsinin tərini əlindəki yaş dəsmalla silə-silə:
– Niyə yatmırsan, ay Xosrov məllim?.. – dedi. – Yatmaqdan yaxşı şey var
dünyada? Həsrətəm mən doyunca yatmağa... Niyə yatmırsan sən?
Xosrov müəllim gözlərini qaranlıq pəncərə şüşəsindən çəkib çiyinlərini birbirlərinə
söykəmiş, boyunlarını büküb kimisi şirin, kimisi narahat bir yuxu ilə
yatmış o sərnişinlərə baxdı, sonra Arzuya baxdı və heç nə demədi.
Arzu dərindən əsnədi, ağzından spirt iyi gəldi, gözləri sulandı və əsnəyəəsnəyə
də:
– Səni gördüm, – dedi, – çox şey yadıma düşdü... Hardan gəldin çıxdın e, sən
bu vaqona?.. – Yenə əsnədi və yenə də əsnəyə-əsnəyə həmin sözləri dedi:– Əşşi,
mənə nə vardı e, tək canımıydı!.. Kələntər məllimin isə, yazığın yeddi qızı qalmışdı!
Və həmin də gecədən sonra, heç üzlərini görmədiyi Kələntər müəllimin o
yeddi qızı Xosrov müəllimin yuxusuna girməyə başladı və Xosrov müəllim o eyni
yuxuya o qədər öyrənmişdi ki, elə bil, o yuxu da Hadrutun altı kilometrliyində yanan
o tonqal kimi, müstəntiq Məmmədağa Ələkbərovun o tüpürcəkləri kimi, Gülzarın bir
sürücüyə gedib Dərbəndə köçməyi kimi, həqiqətən, baş vermişdi, Xosrov müəllimin
ömrünün bir hissəsi idi, beynindəki bir yumaq kütlənin içinə dolmuşdu...
Xosrov müəllim Kislovodskda bir ay qaldı, hər gün müftə «Narzan» içdi,
kirayə qaldığı evin yaxınlığında sakit bir bağça var idi, hər gün gəlib o bağçada
oturdu və bir gün yenə də hardansa uzaqlardan gələn o çağa çığırtısını eşitdi və
Xosrov müəllimə elə gəldi ki, o çağanı üsulluca ana bətnindən çıxaran professor
Fazil Ziyanı gördü, hətta professor Fazil Ziya gəlib Xosrov müəllimlə yanaşı
oturdu... Xosrov müəllim professor Fazil Ziyanı bir-iki dəfə Ələsgər müəllimin o
qonaqlıqlarında görmüşdü və o vaxtdan bəri bu adamı birinci dəfə yadına gətirirdi,
bu adam məsləhətlər vermişdi, yollar göstərmişdi, Arzu dünyaya gəlmişdi və aradan
keçən bu müddət ərzində heç dəyişməmişdi... Xosrov müəllim Kislovodskdakı o
sakit bağçada diqqətlə professor Fazil Ziyaya baxırdı, sonra uzaqdan gələn o çağa
çığırtısı altı yaşlı Cəfərin, dörd yaşlı Aslanın, iki yaşlı Azərin səsinə çevrildi və
professor Fazil Ziya da birdən-birə oldu professor Lev Aleksandroviç Zilber...
Xosrov müəllimin o bir ay ərzində Kislovodskdakı o sakit bağçada belə
görüşləri tez-tez olurdu...
O bir ay ərzində Kislovodskdakı o bağçada oynayan uşaqlar, o bağçaya gəlibgedən
cavanlar hərdən öz-özünə danışan o uzun, arıq qocaya da oradakı skamyalar
kimi, ağaclar kimi adət etdilər; sonra o arıq, uzun qoca yox oldu, amma o nə o bağda
oynayan uşaqlar, nə də o bağa gəlib-gedən cavanlar bunun fərqinə vardı, o
skamyalar, o ağaclar da eləcə o baxçada qaldı...
Xosrov müəllim Bakıya qayıtdı, sonra payız başladı və Xosrov müəllim nəsə o
ilki payızı çox pis keçirdi; Kislovodskın o gözəl havasından sonra Bakının hisli-paslı
havasına təzədən öyrəşə bilmirdi, nəyidisə, çöldə də, evdə də çox narahat idi, bəzən
gecə təngnəfəs olub yuxudan ayılırdı və səhərə kimi yerində oturub yata bilmirdi.
Sonra qış başladı, Bakıya bir-iki günlük qar yağdı, sonra əriməyə başladı və
qarın əridiyi o günlərdən birində– bir bazar günü idi– Xosrov müəllim bazara getdi,
kiloyarım alma aldı, kiloyarım gözəl ətri gələn heyva aldı, bir kilo da narıngi alıb
avtobusa mindi və Səkkizinci kilometrə yollandı.
O zaman səhər tezdən ki, qatar gəlib dayanmışdı Kislovodskda, Arzu ünvanını
yazıb Xosrov müəllimə vermişdi və Xosrov müəllim də o vaxtdan o ünvanı cibində
gəzdirmişdi və indi də Səkkizinci kilometrdə avtobusdan düşüb o ünvanı soraqlaşasoraqlaşa
gəlib üçmərtəbəli köhnə bir bina ilə üzbəüz dayandı.
O üçmərtəbə köhnə binanın daş divarları qapqara qaralmışdı, pəncərələrin,
eyvan sürahılarının taxtasının rəngi quruyub tökülmüşdü və qar əridiyinə görə o
sürahılardan, damdan damcı-damcı çirkli su tökülürdü. O binanın lap yuxarısında,
dam ilə üçüncü mərtəbədəki pəncərələri arasında daşdan yonulmuş və indi güclə
sezilən bir yazı var idi:
1867.
MƏŞƏDI MIRZƏ MIR ABDULLA
MƏŞƏDI MIR MƏMMƏDHÜSEYN OĞLU
Bu bina Xosrov müəllimdən otuz üç yaş böyük idi və Məşədi Mirzə Mir
Abdulla Məşədi Mir Məmmədhüseyn oğlu adlı o şəxsin tikdirdiyi bu bina o vaxtdan
da beləcə lal-dinməz dayanıb dünyanın işlərinə tamaşa edirdi və o dəm Xosrov
müəllimə elə gəldi ki, həmin bina ilə tanışdır, onu hardansa tanıyır, yəni elə bil ki, o
bina da adam idi, tanış gəlirdi və fikirləşirdi ki, mən bunu hardan tanıyıram?..
Ümumiyyətlə, hərdən Xosrov müəllimə elə gəlirdi ki, uzun illər boyu yaşadığı
ömür, əslində, ikinci ömürüdür, yəni ona elə gəlirdi ki, haçansa bir dəfə də bu
dünyada yaşayıb, indi ikinci dəfədir ömür sürür...
Xosrov müəllim həyətə girdi və birinci mərtəbədəki yeddi nömrəli qapının
ağzında dayandı. Qapının sol tərəfində, asfaltın üstündə üç dənə taxta yeşikdən hinə
oxşayan bir şey düzəltmişdilər, illərdən bəri pas atmış dəmir torla çəpərə almışdılar
və çirkli qar suyunda islanmış o taxta-tuxtanın arasında on-on beş toyuq Xosrov
müəllimi görən kimi, qaqqıldamağa, çəpərin içindəki o kiçik sahədə bir-birlərinə
toxuna-toxuna ora-bura qaçışmağa başladı.
O hindəki zir-zibildən elə kəskin bir iy gəlirdi ki, Xosrov müəllim, istəristəməz,
başını yana tutdu və çox qəribədir, elə həmin anda da Xıdır müəllim
Xosrov müəllimin yadına düşdü, Xıdır müəllimin sağlam bədəni, başını dik tutub
sərrast addımlarla şax gəzməyi gözlərinin qabağına gəldi, hətta Xosrov müəllimin
tükü ürpəşdi, çünki ona elə gəldi ki, bu toyuq zılının, zibilin iyi o əldəqayırma
hindən yox, Xıdır müəllimin o sağlam, əzələləri oynayan bədənindən gəlir.
Xosrov müəllim elə bilirdi (və buna yüz faiz əmindi!) ki, 1939-cu ilin o qış
günü onları Xıdır müəllimin şeytançılığı ilə tutmuşdular və Xosrov müəllim heç
vaxt bilməyəcəkdi ki, əslində, onları Ələsgər müəllimin verdiyi məlumata görə həbs
etmişdilər və hərgah dünyada, doğrudan da, ruh deyilən bir şey vardısa, Xosrov
müəllimin belə bir xəbərsizliyindən Ələsgər müəllimin ruhu yəqin ki, özünə bir o
qədər də təskinlik tapmırdı...
Xosrov müəllim əlini qaldırıb 7 nömrəli qapını döymək istədi, amma bu
zaman Arzu özü toyuqların qarasına deyinə-deyinə qapını açdı:
– Bunnar necə acgöz heyvandı belə, ay balam?! Indicə çörək vermədim sizə,
ay çinədanları yırtılmışlar?! – Və Arzu qarşısında dayanmış Xosrov müəllimi
görəndə bir balaca duruxdu, hətta elə bil səksəndi. – A-a-a... – dedi. – Sən hardan
gəlib çıxmısan bura, ay kişi? Səni görəndə qorxuram e, elə bil, ölü dirilib...
Arzu bir əlində içində vermişelli sup qalığı olan boşqab tutmuşdu, o biri əli ilə
evdə geydiyi, çiyinləri süzülmüş göy rəngli köhnə bələdçi köynəyinin yaxasını
bağlaya-bağlaya:
– Keç, keç içəri! – dedi. – Xoş gəlmisən!..
Arzu kənara çəkildi, Xosrov müəllim içəri girdi, darısqal dəhlizdə Arzunun
tuluq kimi şişman və lırt bədəninə toxuna-toxuna ayaqqabılarının üstündən geydiyi
qaloşlarını çıxartdı, əlindəki kağız torbacıq üçün bir yer axtardı, tapa bilməyib
dəhlizdə yerə qoydu, paltosunu soyunmağa başladı.
Arzu:
– Bu saat!.. Qoy bunu verim o acgözlərə... – dedi. – O qədər yemək verirəm
bunnara ki, astarı üzündən baha başa gəlir!.. Ancaq yumurtaları dadlı olur
şoqəriblərin... bunnarı bir-bir Stavropoldan alıb gətirmişəm... – Tələsik həyətə çıxıb
boşqabdakı sup qalığını dəmir tordan toyuqlara atdı, vermişellərin, kartof qırıntısının
bir qismi ilişib dəmir torda qaldı və Stavropoldan gəlmiş o toyuqlar o çirkli-qış
günü, elə bil, aclıqdan çıxmışdılar, bir-birlərinə macal vermədən, yerdəki, tordakı o
sup qalığını dimdikləməyə başladılar.
Arzu içəri keçib əlindəki çirkli boşqabı dəhlizdəki krantın altındakı başqa
çirkli boşqabların, qazanın üstünə qoydu, krantı açıb tələsik əllərini, suplu
dodaqlarını yudu, divardakı mismardan asılmış məhrəba ilə tələsik də qurulandı,
sonra əllərini sövq-təbii bir-iki dəfə evdə geydiyi köhnə bələdçi yubkasının ətəyinə
sildi:
– Gəl e, gəl görək!.. – dedi. – Çox yaxşı iş görmüsən gəlmisən!.. – Və Xosrov
müəllimlə birlikdə o darısqal dəhlizdən otağa keçdi, girdə mizin arxasındakı taxta
kürsülərdən birini çəkib yer göstərdi. – Otur burda... Dayan, döşəkçə verim, altıva
sal...
– Yox, lazım deyil... – Xosrov müəllim əyləşmək istədi.
– Necə lazım deyil?.. – Arzu bərkdən güldü və gözlərinin altı torba bağlamış,
güldükcə ətli buxağı sinəsinə yayılan bu arvadın əprimiş metal dişləri göründü. –
Qupqurusan, zapasın-zadun yoxdu sənin!.. Oturacaqsan, taxta sümüklərivi kəsəcək...
Arzu oturacağında, söykənəcəyində dəmir yayları hiss olunan köhnə divanın
üstündən kiçik və girdə bir döşəkçə götürdü, Xosrov müəllimin altına basdı və özü
də gəlib kişiylə üzbəüz oturdu. Bir müddət heç biri bir söz demədi, sonra Arzu yenə
də güldü:
– Vay səni, Xosrov məllim!.. Niçeqo sebe!.. – dedi. – Elə əvvəlki adamsan a!..
Elə bil, heç qırx il keçməyib, hə? Nə qırx il, qırxdan da artıq!.. Bir danış görək də,
nə var, nə yox?.. Bəs səni necə oldu güllələmədilər? Birdən stukaç-zad olarsan a?!.
Xosrov müəllim bir söz demirdi, elə hey udqunurdu, uzun hülqumu nazik
boğazında enib-qalxırdı və bayırdakı o hinin iyi dəhlizdən keçib otağa da gəlirdi.
«Əziz dostlar! Tamadadan min dəfə üzr istəyirəm ki, onu afsaytda qoyuram.
Ancaq ürəyimə bir gözəl sağlq gəlib ki, onu da bu gözəl məclisdə mən
deməliyəm!..»
– Yaxşı sveji çay var, qoy çay gətirim sənə! – Arzu ayağa qalxıb divanın
yanındakı dolabın gözünü açdı, iki dənə stəkan-nəlbəki götürdü, yarım litrlik
bankada yarımçıq alma mürəbbəsi götürdü, bankanı gətirib Xosrov müəllimin
qabağına qoydu. – Yaxşı mürəbbədi, Saratovdan almışam. Orda xalturit eləmirlər,
bizimkilər kimi oğru döyüllər!.. Özü də ucuz... – Sonra gedib dəhlizin başında yanan
qaz plitəsinin üstündən çayniki götürdü, stəkanları çayla doldurub gətirdi. – Dayan,
qoy qaşıq da gətirim. – Və dolabın elə həmin gözündən də iki dənə çay qaşığı
gətirdi, biri ilə alma mürəbbəsindən götürüb Xosrov müəllimin stəkanına saldı. –
Iç... – Və birdən Arzu yenə də güldü, amma budəfəki gülüşü başqa idi, elə bil ki,
indicə bu qadının sifətindəki o təbəssüm həm onun özününkü idi, həm də kiminsə
bir başqa adamın (bir başqa Arzunun!) təbəssümü gəlib qonmuşdu üzünə. – Yadıva
gəlir, anam rəhmətlik Ordubaddan gəlmiş ləpə qoyardı stolun üstünə?..
Xosrov müəllim gözlərini Arzunun sulanmış və elə bil ki, rəngini itirib açılmış
göy gözlərindən çəkdi, basmadüymələrlə otağın divarına sancılmış fotoşəkillərə,
divanın yanındakı küncdə iki dənə yanaşı kürsünün üstündə, az qala, tavana qədər
üst-üstə qalanmış kitablara baxdı. Arzunun isə sifətindəki o təbəssüm hələ keçib
getməmişdi.
– Əlibaba məllim yadıva gəlir? Mənə deyirdi ki, Sofya Kovalevskaya
olacayam... Ay səni!.. Nolsun e, Sofya cəmi qırx bir il yaşadı, amma mən əllini
keçmişəm, heç ölmək fikrim də yoxdu!..Oxuyuram özümçün gözəl-gözəl kitabları!..
Öldürsə məni, o toyuqların acgözlüyü öldürəcək!..
Arzu yenə də bərkdən güldü və Arzunun o əprimiş metal dişləri, elə bil ki,
üçmərtəbəli binanın yuxarısındakı o yazı kimi:
1867.
MƏŞƏDI MIRZƏ MIR ABDULLA
MƏŞƏDI MIR MƏMMƏDHÜSEYN OĞLU
– dünyanın ölüm-itimindən xəbər verirdi, qatarların getdiyi uzaq-uzaq yollardan
və o uzaq-uzaq yollar boyunca yaşayan milyon-milyon gəldi-gedər insanın hərəsinin
öz taleyindən deyirdi...
– A kişi, sən gəlmisən bura ki, heç ağzıvı açıb bir kəlmə söz deməyəsən?..
Yaxşı, çayıvı iç!.. Əntiqə mürəbbədir, Saratovdan almışam... Özün təksən? Təksən
də, sifətində yazılıb ki, kimsəsizin birisən!.. Bəs kim qulluq eləyir sənə? Bəlkə məni
alasan, hə?– Arzu bu dəfə lap bərkdən, lap ürəkdən güldü. – Eh, neynirsən məni,
hayhayım gedib, vayvayım qalıb!.. Görmürsən, şəkillərə baxırsan... hə də, mənim
nəyimə baxasan?..
Divardan asılmış o şəkillərdən bir-birinə oxşamayan oğlanlar Xosrov müəllimə
baxırdı və o dəm Xosrov müəllimə elə gəlirdi ki, bayırdakı hindən gələn o qoxunu
fotodakı həmin oğlanlar da hiss edirlər...
Arzu ayağa qalxıb o şəkillərə yaxınlaşdı:
– Üçü də oğlanlarımdı!.. – dedi. – Bunu görürsən, bunun atası Cümşüdlüdü...
Yadıva gəlir? Raykomda işləyirdi, əyyaşın, pozğunun biri idi oğraş!.. Məktəbdə
«izhari-nifrət» mitinqlərində gəlib mənə əl çalırdı, məni nümunə göstərirdi... Sonra
guya bizə yazığı gəlirdi, anamı dəlləkxanaya süpürgəçi düzəltdi... O vaxtdan elə
gözü varıymış məndə köpək oğlunun, anam ölən kimi, müharibənin axırlarında,
gəlib tapdı məni... 15-16 yaşım var idi, amma 20 yaş verərdin. Kök idim də,
vaxtından əvvəl yetişmişdim!.. – Arzu gülə-gülə Xosrov müəllimə baxdı. – Sən
danışmırsan, heç olmasa, mən danışım də... Hə, bunun atası o oğraş idi, gorbagor
oldu, öləndə heç üstünə gələn də olmadı! Özünün arvad-uşağı vardı, ayrıca da bir ev
kirayə eləyib məni saxlayırdı... Pozğunun biri idi!.. Məndə sağ yer qoymamışdı,
oğraş! Göydən düşmüşdüm də əlinə, gözünə təpirdi məni, doymaq bilmirdi köpək
oğlu!.. Yaxşı ki, bu, atasına oxşamır. Ancaq arvadı çatlağın biri çıxdı. Qonşuların
yanında mənim saçımı yolurdu, qəhbə!.. Ər-arvad, ikisini də qovdum yanımdan! Əh,
guya ki, qonşular onnan fərlidir?.. Bunu görürsən, bu...
Arzu sözünü kəsib diqqətlə qulaq asdı və o sakitlik içində həyətdəki toyuqların
qaqqıltısı aydın eşidilirdi.
– Eşidirsən o toyuqların səsini? Vay, bunların qarnına şiş girsin! Indicə bir
boşqab sup verdim e, onlara!.. Doymaq bilmirlər ki!.. Mən də burada olmayanda
həyətin uşaqları gəlib yumurtalarını oğurlayırlar... Qonşular da bir tərəfdən milisə
şikayət yazırlar ki, guya bu toyuqlar həyəti batırırlar... Cəhənnəmə yazsınlar! Belə
şeylər mənə kar eləməz!.. Iç, çayıvı iç...
Xosrov müəllim stəkanı ehtiyatla qaldırıb çayı içməyə başladı; nədənsə kişiyə
elə gəlirdi ki, indicə stəkanı əlindən yerə salacaq, çay da, o alma mürəbbəsi də mizin
üstünə, yerə töküləcək, şüşələr sınacaq... Və ümumiyyətlə, Xosrov müəllimə elə
gəlirdi ki, bu stəkanın içindəki heç çay deyil, toyuqlara atılan o sup qalığı kimi bir
şeydi...
Arzu:
– Hə, bu... – dedi və divardakı fotoşəkildən baxan ikinci oğlunu göstərdi. –
Barnaulda yaşayır, eşitmisən, belə bir şəhər? Barnaul! Milsianerdi orda, atası da elə
milsianer idi, rəhmətə gedib. Bunun arvadı rusdu... Oğlanlarımın arasında fərlisi elə
budu, amma əfəldir. Əfəl olmasa, gedib milsianer işləməz ki!.. Arvadı da, deyəsən,
yaxşı adamdı. Nə bilim, görmüşəm bəyəm? Yolum heç düşməyib Barnaula...
Əsgəriydi orda, əsgərlikdən sonra da elə qaldı orda, arvadı da aldı orda... Keçən il
mənə pasılka göndərmişdilər, içində konfet varıydı, bir də bir ayaqqabı. Yaxşı
ayaqqabıydı, ancaq hayıf, ayağımı sıxdı, Rostovda satdım getdi... Iki də uşaqları var,
şəkillərini göndərmişdilər, ikisi də sir-sifətdən xalis rusdu... Bu da ki, üçüncü
oğlumdu, – Arzu əlini üçüncü oğlunun fotosuna tərəf elə uzatdı ki, elə bil, gözünü
çıxarmaq istəyirdi, – əclafın biri çıxdı!.. Atası pis adam döyüldü, pravadnikiydi o da,
tutdular yazığı ki, nə var, nə var, stansiyalarda xırda alver eləyir... Elə türmədə də
öldü yazıq... Bu ev də onunkuydu, arvadı öləndən sonra ona ərə getdim, köçüb gəlib
yığışdım bura... O vaxta qədər orda-burda qalırdım... Atamdan sonra axı, bizim evi
aldılar, anamla məni də atdılar küçəyə... Bu əclafa atamın adını qoymuşdum,
Ələsgər idi adı, ancaq zay çıxdı... Mənnən qalırdı. Pravadnik adamam, çıxıb
gedirdim, ev qalırdı bunun ixtiyarına... Yüz oyundan çıxırdı burda... Piyaniskalıq
eləyirdilər, qumar oynayırdılar... Özü yaxşı kafelşikdi, istəsə, bilirsən nə qədər pul
qazanar?.. Sonra da bir assori qızına aşiq oldu, özündən böyükdü yaşda, Rozadı adı,
bizim yanımızda, ode, orada sberkassada işləyir, tanıyıram, modnı geyinən
qəhbələrdən biridi!.. Özünü sırıyıb bu axmağa!.. Kim alacaqdı onu? Ancaq bu
axmaqla zaksa getdilər... Alıb o qəhbəni bura gətirmək istəyirdi, qovdum evdən!
Indi içib keflənəndə gəlir əclaf, məni qorxudur ki, səni suda verəcəyəm, evin yarısı
mənimdi!.. Mən sənə ev verərəm? Ay sən öləsən! Ancaq neyniyim?.. Şəklini
asmışam burdan də, oğlumdu... Neynim?.. Əclaf gəlib hər dəfə aləmi qatır birbirinə!..
Hələ ki, o qəhbənin evində qalır...
Arzu gəlib yenə də Xosrov müəllimlə üzbəüz oturdu və Xosrov müəllimin içib
qurtardığı boş stəkana işarə edib:
– Yenə çay gətirim sənə? – soruşdu.
Xosrov müəllim:
– Yox, çox sağ ol... – dedi.
– Onda mürəbbə ye!
– Istəmirəm, sağ ol...
– Yaxşı mürəbbədi e! Saratovda pis şey satmırlar...
«Əziz dostlar! Tamadadan min dəfə üzr istəyirəm ki, onu afsaytda qoyuram.
Ancaq ürəyimə bir gözəl sağlıq gəlib ki, onu da bu gözəl məclisdə mən
deməliyəm!..»
– Evim pis döyül, hə? Düzdü, kuxnam yoxdu, ancaq iki otaqdı, kalidorda da,
görürsən, qaz da var, su da var. Tualet də həyətdədi. Bunu assori qəhbəsinə verim,
özüm yenə küçələrə düşüm?.. Hə?!. Bəs sənin o arvadın nə oldu? Təzə almışdın e!..
Adı da Gülzarıydı, yadımdadı...
Xosrov müəllim cavab vermədi, amma birdən-birə, elə bil ki, indiyə qədər
tamam yaddan çıxmış, əlçatmaz, ünyetməz bir uzaqlıqda qalmış Gülzarın qucağının
istisini duydu və o hərarət o çirkli qış günü Xosrov müəllimin sümüklərinə nəsə bir
ilıqlıq gətirmək istədi, amma sonra həyətdəki o hindən gələn qoxunun içində əriyib
yox oldu.
– Gözləmədi, hə səni? Yadıma gəlir, elə bil, indiki kimi görürəm onu...
Yanaqları od tutub yanırdı... o cür arvadlar kişisiz qala bilməz!.. – Arzu güldü. –
Neynəsin e, yazıq? Kişisiz çətin olur də...
Xosrov müəllim ayağa qalxdı.
– Nə oldu?
– Mən gedim...
– Niyə? Otur də, niyə belə tez gedirsən? Qoy bir su qızdırım, yaxşıca başıvı
yuyum sənin, hə? Tək adamsan, bir yaxşıca istirahət elə!..
– Yox, çox sağ ol...
– Nə çox sağ ol e?.. Onda, Varonejdən əntiqə göbələk qurusu almışam, qoy sənə
bir sup bişirim!
– Yox, sağ ol..
– Yüz qram da araq verərəm sənə, vurarsan! Hə? Yoxsa, day, elə qocalmısan,
araq da içə bilmirsən, hə? Nə deyirsən?
– Yox...
– Qorxma e!.. Səni göndərmiyəceyəm mağazaya araq dalınca!.. Özümdə var e!..
Gətirim?
– Yox...
Xosrov müəllim dəhlizə keçdi, əyilib qaloşunu geydi, papağını qoydu, sonra
paltosunu geyinməyə başladı və Arzu da o darısqal dəhlizdə Xosrov müəllimlə
üzbəüz dayanmışdı, köhnə bələdçi köynəyinin dəqiqədə-bir açılan yaxasını
düymələyirdi.
«Niyə qoymursuz səhərdən bəri bu gözəl qızın sağlığına içək, bu gözəl qızı
təbrik edək?»
«Bir dəqiqə, bir dəqiqə, Xosrov müəllim! Arzu qaçmır ki, burdadı,
özümüzünküdü, sağlığına da içəcəyik, təbrik də edəcəyik. Ancaq bu qədəhləri
qaldıraq Xıdır müəllim deyən sağlığa! Doğrusu, bizi qabaqladı Xıdır müəllim, yaxşı
da elədi... Hamımızın ürəyindən dedi, sənin də ürəyindən dedi, Xosrov müəllim!..»
Toyuqlar lap bərkdən qaqqıldamağa başladı.
Arzu:
– Bilirlər ki, indi qapı açılacaq... – dedi. – Bu qədər acgöz heyvan
görməmişəm... Aldadıblar da məni! Stavropolda bunların qarnını necə
doldururmuşlar?.. Axırda mənim özümü də yeyəcəklər!..
Dəhlizin yuxarı başındakı qaz plitəsinin üstündə çaydanın suyu qaynayırdı və
qapağını titrədirdi.
Xosrov müəllim:
– Sağ ol... – dedi.
Arzu dəhlizin döşəməsindəki o kağız torbaçığı göstərərək:
– O nədi elə? – soruşdu.
– Bir az meyvədi, sənə gətirmişəm...
O çaydanın qapağı elə-eləcə titrəyirdi.
– Bəs mən sənə nə bağışlayım? – Arzu, elə bil, birinci dəfə görürmüş kimi,
gözlərini darısqal dəhlizdə ora-bura gəzdirdi. – Hə? Nə bağışlayım?
– Sağ ol...
Arzu deyəsən axtardığını tapdı:
– Hə, bilirsən sənə nə bağışlayacağam? Bax!.. – Sonra xırıltılı səsiylə sözləri
eynilə qırx il bundan əvvəlki kimi, sərrast tələffüz edə-edə, xüsusi ahənglə bərkdən
söyləməyə başladı:
Vı bıli vçera
bezımennı,
Sedaya zurna Suleymana...
Xosrov müəllim qapını açıb həyətə çıxdı.
Toyuqlar daha da bərkdən qaqqıldadı.
Hindən gələn o qoxu adamın beynini deşirdi.
Və Xosrov müəllim o üçmərtəbəli binanın həyətindən uzaqlaşdı, amma bir
müddət hinin o qoxusu da, açıq qapının ağzında dayanıb bərkdən, get-gedə lap
qışqıra-qışqıra şer söyləyən Arzunun xırıltılı səsi də Xosrov müəllimi müşayiət etdi.
Djambula
sedaya dombra...
Tak poyte je
Stalinu
slavu
Stixami,
podobnımi splavu
Zolota
i serebra!..
Sonra üstündə
1867.
MƏŞƏDI MIRZƏ MIR ABDULLA
MƏŞƏDI MIR MƏMMƏDHÜSEYN OĞLU
yazılmış o köhnə üçmərtəbəli bina da, o bina ilə üzbəüz əmanət kassası da
arxada qaldı...
və o səs də kəsildi...
o qoxu da yox oldu...
və o çirkli qış gecəsi də Xosrov müəllim Kələntər müəllimin o yeddi qızını
yuxuda gördü...
o üçmərtəbəli binada, 7 nömrəli mənzildə yaşayan o bələdçi arvadı isə heç vaxt
yuxuda görmədi...
amma hərdən qorxurdu ki, toyuqlar doğrudan da o arvadı yeyərlər...
siçanlar zirzəmidə çağanı yeyən kimi, toyuqlar da o üçmərtəbəli binada, 7
nömrəli mənzildə yaşayan o kök arvadı eləcə yeyərlər...
və hərdən o çağa eləcə qışqırırdı...
və həmişə Kələntər müəllimin o yeddi qızını yuxuda görürdü...
amma elə yuxudaca Xosrov müəllim bilirdi ki, o on yaşlı çoxbilmiş əlaçı qız da,
əslində, Kələntər müəllimin bu yeddi qızının arasındadı...
özü görünmür, amma o da o yuxunun içindədi...
o solğun işıltı da həmin əprimiş metal dişlərin işıltısıdı...
və o qızlar bir ucdan ağlayırdılar...
və o qızların gözlərindən axan su sel kimi küçələrdən axırdı, bir dəniz əmələ
gətirirdi...
və o dənizdə həmin əprimiş metal dişlərin işıltısı altında qayıqlar üzürdü...
o qayıqların heç bir imdad yeri yox idi...
o qayıqlar batacaqdı...
Xosrov müəllim də Kələntər müəllim kimi, o qayıqda üzürdü...
və Xosrov müəllim səksəni keçəndən sonra da, batmaq istəmirdi...
yaşamaq istəyirdi...
görəsən, Məşədi Mirzə Mir Abdulla Məşədi Mir Məmmədhüseyn oğlu adının bu
uzunluğuna müqabil uzun da bir ömür sürə bilmişdimi?..
əlbəttə, Xosrov müəllimin Tülkü Gəldi Qəbiristanlığındakı qəbirlərdən xəbəri
yox idi və bilmirdi ki, o qəbristanlığın tarixi elə bu şəxsin qəbri ilə başlayır...
13
QUZU BUDU
Gecə dərinləşdikcə yollarda maşınlar azalırdı, elə bil ki, torpağa, asfaltın
üstünə bir əmin-amanlıq çökməyə başlayırdı və Abşerona gəlmiş yazın ab-havası
get-gedə aşkar hiss olunurdu və həmin aprel gecəsi dişində kiçik bir quzu budu
tutmuş Gicbəsər asfalt yol boyu axsaya-axsaya daha qaçmırdı, aramla gedirdi.
Düzdü, Gicbəsər çox ac idi, dişindəki bu soyuq budu tez yemək istəyirdi, amma
yollar daha tamam maşınsız idi, hər iki tərəfdəki evlərin, həyətlərin də işığı yanmırdı
və o dəm o gecənin işığı təkcə ayda, ulduzlarda idi; bu sakitlik Gicbəsərin bütün
içinə bir arxayınçılıq gətirmişdi və Gicbəsər bu həndəvərdə başqa bir it iyi də
duymurdu; bu dəmir tor çəpərlər haradasa qurtaracaqdı və Gicbəsər də yoldan çıxıb
rahatca o kiçik quzu budunu yeyəcəkdi.
Sakit olsa da, maşınsız, sürətsiz olsa da, o aydınlıq gecədə uzanıb gedən o
asfalt yolda və ümumiyyətlə, gözünü açıb gördüyü bütün asfalt yollarda Gicbəsər
üçün bir yadlıq, yabançılıq var idi, asfalt yollar beləcə ən sakit, ən səssiz vaxtlarında
da Gicbəsər üçün gizli bir qorxu mənbəyi idi. Tülkü Gəldi Qəbiristanlığındakı
torpaq sahələri nəzərə almasan, bütün ömrünü asfalt üzərində (Qəbiristanlıq
Idarəsinin həyətində...) keçirməyinə baxmayaraq, Gicbəsər yalnız asfaltdan çıxanda,
torpağın üstündə olanda özünü sərbəst hiss edirdi və görünür, bunda ibtidaidəngəlmə
nəsə bir sövq-təbiilik var idi.
O gecəyarısı Gicbəsərin dişində balaca quzu budu tutub getdiyi o asfalt yol
Abşeronun dənizkənarı kəndlərindən birindəki bağlararası yol idi və bu yolun hər iki
tərəfi dəmir torlarla çəpərə alınmışdı, daş hasarlarla tikilmişdi, çünki hər iki tərəf
Bakı sakinlərinin bağları, xüsusi sahələri idi və bu yerlərdə hər bağ da hərənin öz
qalası idi.
Gicbəsərin qaçmağa taqəti yox idi, amma axsaya-axsaya sürətlə addımlayırdı,
bu dəmir torlar, daş hasarlar da qurtarmaq bilmirdi ki, it yoldan çıxsın. Ət çox soyuq
idi, amma Gicbəsərin ağzında olan hissə yavaş-yavaş qızmışdı və bu daş hasarlar, bu
dəmir torlar qurtaran kimi, Gicbəsər bu əti yeyəcəkdi, amma elə indidən itin
dişlərinin arasından axan su adda-budda asfalta tökülürdü.
Gicbəsər neçə gün idi ki, o böyük şəhəri arxada qoymuşdu, böyük küçələr,
böyük binalar, böyük həyətlər arxada qalmışdı və Gicbəsər bu müddət ərzində
zavodların yanından, neft buruqlarının arasından keçib, yerli itlərin təqibindən qaçıb,
bir-birini əvəz edən Bakı kəndlərindən ötmüşdü və ayaqları bu iti hara aparırdısa,
ora da gedirdi.
Gicbəsərin yaralı ayağı ağrıyırdı, zədələnmiş boğazı get-gedə daha artıq
göynəyirdi, başını tərpədə bilmirdi, amma o aylı-ulduzlu erkən yaz gecəsinin
sakitliyi, elə bil, həmin anlarda bir məlhəm kimi, itin Tülkü Gəldi Qəbiristanlığından
çıxdığı vaxtdan bəri keçən bütün günlərinin əzab-əziyyətinin üstünə yayılırdı və
Gicbəsər o asfalt yolla, elə bil ki, (nəhayət!), əbədi bir toxluğa və əbədi bir rahatlığa
doğru gedirdi.
Gicbəsərin dişində apardığı o balaca quzu budu, diş həkimi Nəcəf Ağayeviçin
soyuducusundan çıxmışdı.
Nəcəf Ağayeviç hər şənbə günü Nadejda Fyodorovna ilə birlikdə «Jiquli»
maşınlarına minib Bakıdan 35 kilometr aralıdakı bağlarına gəlirdilər, gecə bağda
qalırdılar, bazar günü axşam sərini təzədən Bakıya qayıdırdılar. Bu ər-arvadın heç
bir qohumu, tanış-bilişi bu bağı tanımırdı, illərdən bəri – o zamandan ki, Nəcəf
Ağayeviç beynəlmiləl ailəsini, xalqlar dostluğunu əsas tutub Azərbaycan KP MKya,
Moskvaya, Sov.IKP MK-ya, şəxsən L.I.Brejnevə yazdlığı ərizələrdən
(«Beynəlmiləl ailə qurmuşuq, mən azərbaycanlı, həyat yoldaşım isə rusdur, gərgin
əməkdən sonra istirahət etməyə yerimiz yoxdur!»), Nadejda Fyodorovnanın rayon
Icraiyyə Komitəsindən tutmuş, şəhər partiya komitəsinəcən hər yerə giribçıxmasından
sonra, nəhayət ki, bu bağı, təmir olunmuş gözəl üçotaqlı bina ilə
birlikdə hökumətdən kirayəyə götürmüşdü – bura bir nəfər də ayaq basmamışdı.
Nəcəf Ağayeviç bağa telefon da çəkdirmişdi və bu beynəlmiləl ailə hər şənbə, bazar
günü dünyanın bütün alış-verişindən, hərc-mərcliyindən, fitnə-fəsadından çox uzaq
olan bir ada kimi, bu bağda istirahət edirdilər, heç kim onları narahat edə bilmirdi.
Nəcəf Ağayeviçlə Nadejda Fyodorovna bu şənbə Bakıda Musiqili Komediya
Teatrında Offenbaxın «Gözəl Yelena» operettasının ilk tamaşasına getdikləri üçün,
bağa gecə gəlib çıxdılar və dəmir qapılarının saysız qıfıllarını açdıqdan sonra, evə
girəndə Nadejda Fyodorovna adəti üzrə birinci növbədə fin soyuducusunun içinə
baxdı və tamaşa etdikləri operettanın o gözəl təsirindən hələ də çıxmadığı üçün üzgözünü
xüsusi bir nifrətlə turşudub:
– Oy!..– dedi. – Tvoya ta baranina ujasno vanyayet!..
Məsələ burasında idi ki, Nadejda Fyodorovnanın qoyun əti ilə arası yox idi,
dana ətini, yağsız çoşka ətini, toyuğu, hinduşkanı, təzə ağ balığı üstün tuturdu və
buna görə də bu ər-arvad heç vaxt qoyun əti almırdı. Nəcəf Ağayeviç isə qoyun ətini
xoşlayırdı, hətta bəzən dalbadal mal əti yeyəndə zəiflədiyini hiss edirdi, qoyun əti
Nəcəf Ağayeviçə, elə bil ki, qüvvət verirdi, şəhərdəki saysız-hesabsız işlərini daha
cəld və daha artıq bir şövqlə görürdü və qoyun əti yediyi günlərdə gecələr Nadejda
Fyodorovna da ərindən razı qalırdı...
Qoyun ətini Nəcəf Ağayeviç üçün rayonlardan, Bakının ətraf kəndlərindən
gəlmiş müştəriləri, yəni xəstələri nəğd verəcəkləri puldan əlavə, hərdənbir pay
gətirirdilər. Bu körpə quzu şaqqasını da keçən həftə pay gətirmişdilər, Nəcəf
Ağayeviç o şaqqanın yuxarı hissəsini – qabırğaları, qolu yeyib qurtarmışdı, bu kiçik
budu isə yeməyə macal tapmamışdı və o bud keçən bazar günündən bağdakı
soyuducuda qalıb ağırlaşmışdı.
Nəcəf Ağayeviç gəlib sellofana bükülmüş əti soyuducudan çıxartdı, burnuna
tutub iylədi – ət, doğrudan da, ağırlaşmışdı, amma Nəcəf Ağayeviç hər ehtimala
qarşı:
– Seyças vımyu. Mojet proydet zapax...
Nadejda Fyodorovna daxilən yenə də Offenbaxın operettasına qayıtmışdı və
bu yaraşıqlı qadından çıxmayan bir səxavətlə:
– Da bros tı etu baraninu!– dedi. – Çto uvideli tvoi dikari v baranine, a, ne kak
ne poymu?.. Aziat tı vsyo je, aziat!.. – Və Nadejda Fyodorovna gözəl Yelenanın
ariyasını zümzümə edə-edə otaqda dövrə vurdu, hər ay Israildən içi pal-paltarla dolu
bağlamalar gətirdən alverçidən (daimi müştərisindən) aldığı enli və uzun donunun
balaqları çətir kimi hava ilə doldu.
Nəcəf Ağayeviç əlində tutduğu o kiçik quzu buduna baxdı, sonra Nadejda
Fyodorovnaya baxdı və arvadının o gözəl ovqatını pozmasın deyə, evdən çıxdı, üç
metrlik daş hasara aldığı həyətdən də çıxdı və əti bağın dəmir darvazası ilə üzbəüz
ucalmış xartut ağacının dibinə qoydu – qurd-quş götürüb aparacaqdı... Nəcəf
Ağayeviç dərindən köksünü ötürüb evə qayıtdı: o gözəl operettadan sonra kefi
qalxmış Nadejda Fyodorovnanı hələ gecə də razı salmaq lazım idi...
O əti o böyük xartut ağacıənın dibindən tapan isə Gicbəsər oldu və taqəti
qalmadığı, yaralanmış qılçı ağrıdığı, boynu sızıldadığı üçün güclə addımlayan bu it,
o əti ağzına alan kimi, elə bil, o ətlə bərabər, o böyük xartutun kötüyündən bir qüvvə
də aldı, hansı bir başqa itinsə, hansı bir başqa varlığın, ya qeyri-varlığınsa o əti
ağzından qapacağından qorxa-qorxa qulaqlarını qısıb axsaya-axsaya qaçdı, Nəcəf
Ağayeviçin dəmir darvazası tərəflərdən uzaqlaşdı.
Nəcəf Ağayeviçin bağı bağların arası ilə dənizə gedən əsas asfalt yolun
kənarında idi və o böyük xartut ağacının yanından qaçıb bu yola düşmüş Gicbəsər
addımlarını yavaşıtmışdı, o quzu budunun ağzında saxladığı isinmiş hissəsi, o
aydınlıq aprel gecəsi həyatının yaxşı məqamlarını itin yadına salırdı: haradasa,
haçansa bayırın soyuğunda, çovğununda isti bir yerdə yatmasını, haradasa, haçansa
– çox-çox uzaqda qalmış vaxtlarda tumarlanmasını, hardasa, haçansa ağappaq bir
qancığın onun dalına düşməsini... və bütün bu görümlərin hamısı Gicbəsərin
beynində bir dumana bürünmüşdü, bir-birinə qarışmışdı, amma o dumanın da,
qatmaqarışıqlığın da içində indi nəsə bir ilıqlıq, mülayimlik hiss edirdi (indicə
yeyəcəyi o quzu buduna görə?) və həmin hiss Gicbəsərin ayağının ağrısını da,
boğazının ağrısını da, elə bil ki, azaldırdı.
Və bu vaxt Gicbəsər uzaqdan gələn maşının iyini duydu, səsini eşitdi və
qəribədir, həmin gecə sakitliyi içindəki yaxınlaşan o səs Gicbəsərə heç bir bəd
əməldən xəbər vermədi, Gicbəsəri diksindirmədi, təşvişə salmadı, elə bil ki,
Abşerondakı o aydınlıq gecədə, dənizə gedən o yolda heç bir pis iş, heç bir bəd əməl
ola bilməzdi.
Maşının işığı göründü, o maşının ardınca ikinci bir maşın da döngəni buruldu
və Gicbəsər sürətini bir az artırıb yolun kənarına çəkildi.
... Irəlidə gedən «Jiquli»də dörd nəfər əyləşmişdi: maşının sahibi və sürücüsü
gənc nasir Səlim Bədbin, qabaqda onunla yanaşı oturmuş tanınmış şair, əməkdar
incəsənət xadimi Ərəstun Bozdağlı, arxada da iki nəfər gənc şair.
Səlim Bədbin nəşriyyatda redaktor işləyirdi və bu «Jiquli»ni də iki ildən bəri
qaytarıb qurtara bilmədiyi borc pulla almışdı ki, nəşriyyat müdiri, əzazil və nadan
Islamzadə kimilərinin, qrafoman və əqidəsiz Mürşüd Gülcahani kimilərinin, otuz il
qəzetlərdə ədəbiyyat şöbələrinə müdirlik edib qarınlarının marağını və təəssübünü
Azərbaycan bədii ədəbiyyatının marağına və təəssübünə çevirmiş Muxtar
Xudavəndə kimilərinin, adını gənc şair, gənc nasir, gənc tənqidçi qoyub vətənin və
millətin yox, öz şəxsi mənafelərini güdən, Səlim Bədbinin bədii nailiyyətlərinə
paxıllıq edən bəzi başqa həmqələmlərin gözünə girsin. Səlim Bədbin ac qarnına
sükan arxasında oturanda da maşını elə şəstlə sürürdü ki, Mürşüd Gülcahani kimi
naftalin iyi verən soxulcanlar hiddət və qeyzlərindən bilmirdilər nə eləsinlər.
On il Allahın hər verən günü gecələr üç uşağı və arvadı yatandan sonra,
birotaqlı mənzilinin mətbəxində, az qala, səhərə kimi işləyə-işləyə özünü ədəbiyyata
həsr edən, qələmi ilə millətin qeyrətini çəkməyə çalışan Səlim Bədbinin nəhayət ki,
ikinci hekayələr kitabı çapdan çıxmışdı və qabaqcıl cavanları gözü götürməyən,
onların yazısından bir şey başa düşməyən mühafizəkar müdir Islamzadənin
müqavilədə o kitabın qonorarını ən aşağı məbləğlə müəyyənləşdirdiyinə
baxmayaraq, dünən nəşriyyatın mühasibatından pul almış Səlim Bədbin bu gün
dostlarını və həmişə gənclərlə yaxınlıq eləyən, gənclərlə oturub-duran Əməkdar
incəsənət xadimi şair Ərəstun Bozdağlını Abşerondakı gözəl kababxanalardan birinə
dəvət etmişdi, dörd-beş saat o kababxanada oturub qoyun və ağ balıq kababı yeyəyeyə
yeni kitabı əməlli-başlı yumuşdular və həmin aylı-ulduzlu şənbə gecəsi dəniz
sahilinə gedib Xəzərin mənzərəsinə tamaşa etmək istəyirdilər; arxadan gələn
«Jiquli»də də Səlim Bədbinin dostlarından üç nəfər cavan qələm əhli əyləşmişdi.
«Jiquli»nin bütün pəncərələrini açdırsa da, külək sürətlə gedən maşının içində
qıy vursa da, kababxanadakı məclisdən sonra, əməkdar incəsənət xadimi şair
Ərəstun Bozdağlıya hava çatışmırdı və bu yekəpər, canlı adam hər dəfə də havanı
dərindən ciyərinə çəkib deyirdi:
– Tarixi bir qonaqlıq oldu, igid. Mürşüd Gülcahani yetmişi keçib, lakin xəsis,
bütün ömründə bizi bircə dəfə qonaq edib, o da ki, oğlunun toyunda. Xəsis və quru.
Zalım oğlu, «Pravda» qəzetinin baş məqalələrinə oxşayır.
Söhbət Mürşüd Gülcahanidən düşəndə Səlim Bədbin özünü saxlaya bilmirdi
və bu dəfə də nifrətlə üz-gözünü türşudub:
– Həmin toya görə indi Islamzadə ona yaltaqlanır, – dedi. – Bizdə ən böyük
vəzifə Əbdül Qafarzadənin qohumu olmaqdı. Tanıyırsız də onu, Ərəstun məllim?
Qəbiristanlığın direktorudur...
– Necə tanımıram, igid? Dabbaqda gönünə bələdəm.
– Bir dəfə üzünə dedim.
Əməkdar incəsənət xadimi, tanınmış şair Ərəstun Bozdağlı həmin tarixi
məclisdə çox içsə də, hər halda, ayıqlığını tamam itirməmişdi və təəccüblə Səlim
Bədbinin o aydınlıq gecədə daha da zəif və solğun görünən sifətinə baxa-baxa:
– Kimin üzünə dedin, qoçaq? – soruşdu. – Əbdül Qafarzadənin?
Bayaqdan bəri arxada oturub hıçqıra-hıçqıra sükut edən gənc dost:
– Onun üzünə desəydi, indi sümüyü çürüyürdü Tülkü Gəldi
Qəbiristanlığında... – dedi.
Ərəstun Bozdağlı gözlərini Səlim Bədbinin solğun sifətindən çəkib əzəmətli
başını arxaya çevirdi, yoğun səsi ilə bərkdən və acı-acı güldü.
Ikinci kitabının nəşri uğrunda illərdən bəri apardığı mübarizə Səlim Bədbinin
əsəblərini tamam korlamışdı və gənc nasir bütün içindən axıb gələn bir hiddətlə
sükanı sıxa-sıxa:
– Eybi yoxdu... – dedi. – Bu millətin də oyanan vaxtı olacaq. Onda Əbdül
Qafarzadələrin də üzünə tüpürəcəyik...
Əməkdar incəsənət xadimi Ərəstun Bozdağlı yenə də gənc qələm dostunun
solğun bənizinə baxdı:
|