Gicbəsər o kolun ardından, yarpaqların, budaqların arasından həmin maşını da,
yaxınlaşan sanitarları da görürdü və bu it yəqin hiss edirdi ki, nəsə bəd bir əməl
hazırlanır və buralardan qaçıb getmək lazımdır, amma elə qaçıb getmək lazımdır ki,
gözə görünməsin. Gicbəsər arxa ayaqlarını qaldırdı, başını isə kolun dibindən
çəkmədi, amma əlitüfəngli o sanitar, itin kolun ardından donbalmış arxa hissəsinin
qəhvəyi qara tüklərini o saat gördü və tüfəngi sinəsinə sıxıb tətiyi çəkdi.
Atəşin boğuq səsi dənizə, bulvara, maşınların hələ tək-tük ötdüyü o geniş
prospektə yayıldı və elə həmin anda da Gicbəsər arxa qılçının yuxarı hissəsinin
kənarında əvvəlcə bir zərbə, sonra da ağrı hiss etdi, amma it zingildəmədi, belə bir
məqamda başa düşdü ki, səs çıxarmaq olmaz, təzədən yerə sinib, az qala, sürünəsürünə
ikinci kolun arxasına keçdi. Bu ikinci koldan sonra, sıx zeytunluq başlayırdı
və imkan tapıb o ağaclığa atılmaq və buralardan qaçıb qurtarmaq lazım idi.
Əlitüfəngli sanitar diqqətlə o dekorativ kola tərəf baxırdı və itin hansı səmtə
yatdığını müəyyənləşdirmək istəyirdi, amma bu vaxt gözlənilməz bir hadisə baş
verdi: görünür, Gicbəsərin izinə düşmüş və sübh tezdən xəlvətcə ona yaxınlaşmaqda
olan o cavan, o sağlam Qara it bir göz qırpımında zeytunların arasından sıçrayıb
asfalta çıxdı və irəli qaçıb həmişəki hikkəsi, yoğun və acıqlı səsi ilə sanitarların
üstünə hürməyə başladı.
Dalbadal açılan iki boğuq atəş səsinin yüngül əks-sədası yenə də ətrafa yayıldı
və o qara itin acıqlı hürüşü əvvəlcə zingiltiyə, sonra zarımağa çevrildi, Qara it
yerində yırğalandı, başı aşağı düşdü, ayaqları büküldü və it böyrü üstə qarnından,
sinəsindən axan qanın içinə sərildi. Qara itin ayaqları bir-iki an havada çapaladı,
sonra uzanmış itin beli gərildi, ayaqları qanrıldı və o Qara it hərəkətsiz qaldı.
Atəş açan sanitar, tüfəngi çiyninə keçirdi, xalatının cibindən yekə göy əlcəklər
çıxarıb əllərinə geydi, ikinci sanitar da eyni yekə əlcəkləri cibindən çıxarıb əllərinə
geydi və hər iki sanitar o axmaq Qara itə yaxınlaşdı, biri qabaq ayaqlarından, o biri
arxa ayaqlarından yapışıb Qara iti qaldırdılar və furqona tərəf apardılar.
Özünü gözəl bir hədiyyə kimi güllə qabağına verən o Qara it sanitarların bu
səhərki siftəsi idi və bəxtləri beləcə gətirsəydi bugünkü planlarını yerinə
yetirəcəkdilər; sanitarlar kimsəsiz küçə itlərinin daldalana biləcəyi yerləri
gəzəcəkdilər, şəhərdən cürbəcür epidemiyalar yayılmasın, təmizlik olsun deyə,
yalnız xəstə yox, ümumiyyətlə, it axtaracaqdılar; plan it cəsədi tələb edirdi, odur ki,
qabaqlarına çıxan kimsəsiz küçə itlərini vuracaqdılar və bu minval ilə şəhərdə
təmizlik işləri aparacaqdılar...
Gicbəsər kolun ardından bütün bunların hamısını görürdü və bu hadisənin
gözlənilməzliyi, elə bil ki, itə boğazının, qılçının ağrısını unutdurmuşdu, Gicbəsər
səsini çıxarmayıb baxırdı və elə ki, sanitarlar furqonun qapısını açıb Qara itin
cəsədini içəri atdılar, Gicbəsər cəld sıçrayışlarla özünü zeytunluğa verdi və
ağrılarına baxmayaraq var gücü ilə qaçıb bu yerlərdən uzaqlaşdı.
Tüfəngsiz sanitar bayaqkı dekorativ kola tərəf baxıb:
– Bəs o birisi nə oldu? – soruşdu.
Tüfəngli sanitar da başını çevirib əvvəlcə o kola, sonra zeytunluğa tərəf baxdı,
itin hansı istiqamətdə qaçıb canını qurtardığını düzgün müəyyən etdi və sidqürəkdən
təəssüflənə-təəssüflənə:
– Qaçıb getdi əclaf!.. – dedi.
Ikisi də maşına mindi.
Sürücü növbəti dəfə əsnəyib motoru işə saldı və yenə də deyindi:
– Katafalkada işləmək bundan yaxşıdı!.. It ölüsü daşıyıram...
Sonra o furqonlu maşın yerindən tərpəndi.
Dan yerinin o qırmızısı yavaş-yavaş çəkilib gedirdi və Bakıda yeni gün
başlayırdı.
11
ƏBDÜL QAFARZADƏ
Həmin aprel günü Əbdül Qafarzadə ikinci dəfə Rayon Icraiyyə Komitəsinin
binasından çıxıb trolleybusla Qəbiristanlıq Idarəsinə gələndən sonra iki nəfər içəri
girib bir balaca qanını qaraltdı. Biri tösmərək oğlan idi, o birisi şalban kimi arıq və
uzun bir tip idi (bayaq iclasdan qayıdanda da gözləmə otağında gördüyü bunlar idi),
ölüləri üçün yer istəyirdilər və rüşvət əleyhinə mübarizə aparırdılar... Axmaqlar!..
Əbdül Qafarzadənin bu cür miskin adamları görməyə gözü yox idi; əfəl və mənasız
məxluqat olduqları üçün ciblərində də bir qəpik olmur və buna görə də ədalət
uğrunda mübarizə aparırlar, qanundan dəm vururlar... Bu tösmərək axmaq da Sovet
Ittifaqının qanunlarını köməyə çağırırdı və Sovet Ittifaqındakı qanun keşikçisi
mayor Məmmədov da, elə bil, qəsdən burada idi, o axmağın qolundan yapışıb
göstərdi ona həmin qanunları.
Tülkü Gəldi Qəbiristanlığı neçə ildən bəri sahə müvəkkili işləyən milis
mayoru Məmmədovun ərazisinə daxil idi və o bu işə gələndə baş leytenant idi,
Əbdül Qafarzadənin sayəsində indi mayor olmuşdu, amma – insan, əlbəttə,
naşükürdür– indi özünü daha sahə müvəkkilliyinə sığışdırmırdı, axır vaxtlar Əbdül
Qafarzadəyə, xüsusilə, yaltaqlanırdı ki, kişi gedib Bakı Şəhər Milis Idarəsində,
yaxud Daxili Işlər Nazirliyinin özündə ağız açsın, onu irəli çəksinlər. Könlündən
rayon milis şöbəsinin rəisliyi keçir, hələlik, heç olmasa, rəis müavini olmaq istəyir...
Əvvəllər Əbdül Qafarzadə Mirzəibinin, Ağakərimin, yaxud Vasilinin vasitəsilə
hərdənbir Məmmədova cib xərcliyi verirdi, amma indi Məmmədovun özü yeri
düşəndə Mirzəibiyə, Vasiliyə, Ağakərimə işarələr vururdu, eyhamlarla (birbaşa
deməyə ürək eləmirdi) Əbdül Qafarzadə üçün pul təklif edirdi ki, gedib yuxarılarda
işini düzəltsin. Acın biri idi, burada sahə müvəkkili olandan sonra özünü düzəldib –
ərazisində nə qədər istəyirsən kababxana, dükan, dondurma sexi, qayış sexi,
keramika fabriki, pivəxanalar... Ayda hər birindən çox yox, elə beşcə yüz manat
alsa, gör nə qədər eləyir!.. Hər halda, acından ölmür... Nə isə, Məmmədov da adam
idi və özünü oda-közə vurub adam kimi yaşamaq istəyirdi. Ola bilsin ki, Əbdül
Qafarzadə ona kömək edəcəkdi, amma hələ qəti qərara almamışdı. Indi isə bərk
acımışdı və təzə katibə qızı çağırıb çörək və pendir almaqdan ötrü mağazaya
göndərdi. Əlbəttə, bu qız səhlənkarlıq eləmişdi və o iki nəfəri icazəsiz içəri
buraxmışdı, Əbdül Qafarzadə isə səhlənkarlığı, xüsusən, işdə səhlənkarlığı
xoşlamırdı; amma Əbdül Qafarzadə cavan və gözəl qızları xoşlayırdı və o
səhlənkarlıq üstündə hissə qapılıb bu qızı qovmağın hələ vaxtı deyildi... Bir də ki, –
Əbdül Qafarzadə buna qətiyyən şübhə etmirdi – o iki nəfəri bura katibə qız yox, getgedə
ağlını itirən Bədurə buraxmışdı. Bədurə öz qocalığı ilə heç cürə barışa bilmirdi
və indiyə qədər də Əbdül Qafarzadəni qısqanırdı, bunu heç kim görməsə də (bəlkə
heç Bədurənin özü də indi bu fikirdə deyil!..), Əbdül Qafarzadə yaxşı görürdü.
Azərbaycanlı belədir də... Odur, mühasib Yevdakiya Stanislavovna, ya da ki, kassir
Marqarita Iosifovna, indi qocalıblar, başlarını da aşağı salıb işlərini görürlər.
Cavanlıqlarında bəyəm Əbdül Qafarzadə ilə az oyundan çıxmışdılar?.. Hər halda,
Bədurə ilə yaxşıca bir söhbət eləmək lazımdı, bu təzə qızın məsələsi isə gələcəyin
işidi, indinin yox. Axır ki, bugünkü qəzetləri rahat oxumaq olar...
O gözəl katibə qız, Əbdül Qafarzadənin verdiyi iki əzik-üzük manata baxabaxa
çaşbaş qalmışdı: bu kişi ki, camaat bunun haqqında bu qədər danışır, adicə
qəbirqazanlar kimi, cibindən iki dənə əzik manatlıq çıxartdı və bu adam da nahar
zamanı adicə qəbirqazanlar kimi, dükan pendiri ilə dükan çörəyi yeyəcəkdi; qız gah
əlində tutduğu o əzik manatlara, gah da Əbdül Qafarzadənin indicə kabinetə girib
ardınca örtdüyü içi pambıq dolu qəhvəyi meşin qapıya baxırdı.
Makinaçı Bədurə xanım bu Qəbiristanlıq Idarəsinin də, Əbdül Qafarzadənin
də cikinə-bikinə bələd idi (hər halda, iyirmi ildən artıq Qəbiristanlıq Idarəsində
işləyən bu arvada belə gəlirdi!) və buna görə də öz küncündə oturub makinadakı
yazısını davam etdirə-etdirə təzə katibə qıza baxdı,qıpqırmızı boyadığı
dodaqlarından bir təbəssüm keçdi. Bədurə xanım da iyirmi iki il bundan əvvəl bu
idarəyə gələndə, iyirmi iki il bundan əvvəl birinci dəfə Əbdül Qafarzadə ilə tanış
olanda beləcə çox çaşbaş qalmışdı, amma indi sakitcə öz küncündə oturub
dissertasiya çap edirdi. Əbdül Qafarzadə icazə vermişdi ki, Idarə işi olmayanda (bu
Idarədə isə makinaçı işi çox az idi – əsas etibarilə Əbdül Qafarzadənin yuxarı
təşkilatlara göndərdiyi arayışlar, raportlar, bəzi xahişlər, vəssalam) Bədurə xanım öz
müştərilərinin işini yazsın və Bədurə xanım da bir ucdan cürbəcür – ədəbiyyatdan
tutmuş fəlsəfəyəcən – dissertasiyaları makinada yazmaqla məşğul idi.
Əlbəttə, o cavan, o gözəl katibə qızın haradan ağlına gələ bilərdi ki, Əbdül
Qafarzadə kimi bir adam niyə nahar üçün pendir-çörək istəyir? Niyə Bakının gözəl
kababxanalarından (bu kababxanalardan biri elə Tülkü Gəldi Qəbiristanlığının
yanında idi və «Əlvida» adlı həmin kababxananın da əsl sahibi Əbdül Qafarzadə idi)
özü üçün yemək gətirtmir? Bunun səbəblərindən biri çox sadə idi: Əbdül Qafarzadə
indi burada əməlli-başlı nahar eləsəydi, evə gedəndə daha çörək yeyə bilməyəcəkdi
və o da evdə çörək yeməyəndə, Qaratel dilinə, ümumiyyətlə, heç nə vurmurdu.
Amma indi Əbdül Qafarzadə bir az pendir-çörək yeyəcəkdi, işdən sonra isə, gedib
evdə xörək hazırlayacaqdı (əgər Qaratel yenə də sözə baxmayıb ağrıya-ağrıya özü
kişinin işdən qayıtması üçün xörək hazırlamayıbsa), iştahla yeyəcəkdi və Qarateli də
məcbur edəcəkdi ki, bir az yesin. Nə isə, dünyanın beləcə qəribə işləri o cavan
katibə qızın ağlına haradan gələ bilərdi?
Əbdül Qafarzadə kabinetində öz mizinin arxasına keçib qəzetləri oxumağa
başlayanda, bayaq Fərid Kazımlının qəzetin arxasında gizlənməyini yadına saldı,
sonra da, nədənsə, birdən-birə Burunu xatırladı və səhərin o narahatlığından,
günortanın beləcə tələsikliyindən sonra qollarını geniş açıb ləzzətlə gərnəşdi,
gülümsədi.
Fərid Kazımlı da, Burun da tamam başqa-başqa adamlar idi, cəmiyyətdə
tamam başqa-başqa mövqe tutmuşdular, amma o dəm Əbdül Qafarzadə üçün bu iki
adamın arasında nəsə bir yaxınlıq, bir qohumluq var idi.
Tülkü Gəldi Qəbiristanlığındakı Qəbiristanlıq Idarəsinin həyətində kiçik morq
binası var idi və bu birmərtəbəli, üç otaqlı, ağ əhənglə ağardılmış binada heç vaxt
ölü olmurdu (kim gəlib öz ölüsünü basdırmamışdan əvvəl morqa qoyacaqdı?).
Qəbiristanlıq Idarəsinin bənnası, dülgəri, çilingəri, yükdaşıyanı (belə bir ştat da var
idi, tabutu maşından düşürdüb qəbirə aparmalı idi), alkoqolik qəbirqazanlar və
onların Qəbiristanlıq Idarəsinin ştatında olmayan başqa alkoqolik dostları morqa su
çəkmişdilər, ocaqxanadan qaz çəkmişdilər, soba qurmuşdular və o soba elə yanırdı
ki, döşəməsi və divarları ağ kaşı ilə hörülmüş otaqlar qışın oğlan çağında da istidən
tərləyirdi.
Gündüzlər morqda demək olar ki, adam olmurdu, təkcə bir-iki alkoqolik
keflənib kiçik otağın döşəməsində yatırdı, amma elə ki, axşam düşürdü və xüsusən,
elə ki, gecə yarıya çatırdı, bu morqda həyat qaynamağa başlayırdı, maşınlar gəlib
Qəbiristanlıq Idarəsinin həyətinin örtülü darvazası qabağında dayanırdı, məhrəm
müştərilər özləri maşından düşüb morqa tərəf gedirdi, yaxud da taksidə gəlmiş
müştəri üçün qəbiristanlığın qarovulçusu Əflatun həvəslə morqa qaçırdı.
Məsələ burasında idi ki, gecələr şəhərdə ərzaq dükanları, restoranlar
bağlanandan sonra, morqda araq alveri gedirdi, araq şüşəsinin hər biri üçqat, beşqat
bahasına, bəzən bundan da artıq qiymətə satılırdı (baxırdı müştəriyə və havaya;
qarlı-çovğunlu gecələrdə burada arağın qiyməti qızdırmalı xəstənin qoltuğundakı
termometrin civəsi kimi, o saat yuxarı qalxırdı). Gecələr morqda gedən bu alverin öz
sistemi yaranmışdı və Tülkü Gəldi Qəbiristanlığındakı bu gecə həyatının
müqəddəratı, qazancı Əbdül Qafarzadənin Qəbiristanlıq Idarəsindəki üç nəfər yaxın
adamının əlində idi: ocaqçı Mirzəibinin (bu adam universitetin şərqşünaslıq
fakültəsini bitirmişdi, Misirdə, Liviyada tərcüməçi, Elmlər Akademiyasında elmi
işçi işləmişdi və təxminən on il bundan əvvəl Əbdül Qafarzadə onu ocaqçı
vəzifəsinə götürmüşdü), çilingər Ağakərimin, bir də ki, qəbirqazan vəzifəsində
işləyən Vasili Mitrofanovun, Burun isə bu adamların, necə deyərlər, qeyri-rəsmi,
özbaşına şəriki idi.
Əlbəttə, nə Mirzəibi Qəbiristanlıq Idarəsinin ocaqxanasında barmağını bir işə
vurmuşdu, nə Ağakərim çilingərlik edirdi, nə də Vasili Mitrofanov qəbir qazırdı.
Bütün bu işləri alkoqolik qəbirqazanlar və onların alkoqolik dostları görürdülər, bu
üç nəfər isə Əbdül Qafarzadənin nəzarətçiləri, iş düzəldənləri, etibarlı adamları idi,
Tülkü Gəldi Qəbiristanlığının təkcə gecə yox, gündüz həyatı da, əsasən, bu üç
nəfərin əlində idi. Bu üç nəfərin – Mirzəibinin, Vasilinin, Ağakərimin Əbdül
Qafarzadəyə xidmətlərində elə bir səliqə-səhman var idi, öz aralarında da elə bir
işgüzar münasibət yaranmışdı ki, onlar bir-birlərinə qətiyyən mane olmurdular,
əksinə, üçü də bir nəfər kimi kişiyə xidmət edirdilər, çünki öz sahiblərini yaxşı
tanıyırdılar, kim olduğunu bilirdilər. Bir neçə il bundan əvvəl üç yox, dörd nəfər
idilər (dördüncü nəfər indi adını da çəkməyə cürət etmədikləri Quba yəhudisi
Alyoşa idi) və dördü də Əbdül Qafarzadənin ən yaxın adamları idi, amma günlərin
bir günündə şeytan, Alyoşanı yoldan çıxartdı, nəsə bəd bir iş tutmuşdu, Əbdül
Qafarzadəni satmışdı (nə Vasili, nə Mirzəibi, nə də Ağakərim indiyə kimi də o
bədbəxt Alyoşanın günahını dəqiq bilmirdi) və Alyoşanı dənizdən tapdılar: gecə
güllə ilə dənizkənarı bulvarda vurub dənizə tullamışdılar, külək isə cəsədini aparıb
Zığ tərəfə çıxarmışdı. Ağakərim də, Mirzəibi də, Vasili də bədbəxt Alyoşanın nə
üstündə öldürüldüyünü dəqiq bilmirdilər, amma kim tərəfindən öldürüldüyünü
tamam dəqiq bilirdilər...
Ümumi işlərdən başqa bu üç nəfərin hərəsinin öz müəyyən xidmət sahəsi var
idi: Mirzəibi Əbdül Qafarzadənin pul məsələlərinə baxırdı, Ağakərim qolugüclü,
sərt və kobud adam idi, taksi sürücülərindən tutmuş alkoqoliklərəcən hamı ilə Əbdül
Qafarzadənin adından o danışırdı. Tülkü Gəldi Qəbiristanlığındakı nizam-intizam
işləri də ona baxırdı və «Əlvida» kababxanasına da o nəzarət edirdi, Vasili
Mitrofanov isə, əsasən, Əbdül Qafarzadənin eşq-məhəbbət məsələlərinin həlli ilə
məşğul olurdu.
Morqun otaqlarından birinə araq yığılırdı. Bu araqları Mirzəibi, Ağakərim,
Vasili günorta adam göndərib xüsusi dükanlardan aldırırdı (dükan müdirləri isə
araqları dövlətdən yox, ucuz qiymətə ayrı-ayrı şəxslərdən götürürdü – araqlar
əldəqayırma idi). Bundan başqa, Qəbiristanlıq Idarəsinin ayrı işçilərinin də burada
öz şəxsi araqlarını saxlayıb satmaq ixtiyarı var idi. Işçilər bu araqları, əsasən,
dükandan yox, ölü sahiblərindən pay götürürdülər və hərə də öz arağını tanıyırdı, öz
hesabını bilirdi. Işçilərin bu xırda alveri morqda mərkəzləşdirilmiş araq satışının
müqabilində, bir növ şəxsi mülkiyyət, şəxsi alış-veriş idi. Hətta bəzən alkoqolik
qəbirqazanlar da qırsaqqız olub ölü sahiblərindən qopardıqları və hamısını içə
bilmədikləri bir-iki şüşə arağı həmin otaqda saxlayıb satırdılar. Mirzəibi də,
Ağakərim də, Vasili də, süpürgəçi Nastyadan tutmuş hərdənbir makinaçı Bədurə
xanıma qədər qəbiristanlıq işçilərinin və alkoqoliklərin bu xırda alverinə göz
yumurdu, çünki uzun illərdən bəri Əbdül Qafarzadənin əlinin altında işlədikləri
üçün, kişinin xasiyyətinin bəzi cəhətləri bu adamlara da keçmişdi: kasıb-kusubda
işin olmasın, qoy necə bilirlər, başlarını dolandırsınlar, amma elə ki, qudurdular,
başlarından vur.
Morqun ikinci və ən böyük otağı qumarxana idi. Qəbiristanlığın işçiləri, bəzi
müştəriləri, taksi sürücüləri (xüsusən, Burun), şəhərin başqa yerlərindən, hətta
Kislovodskdan, Rostovdan, Tallinndən, Tiflisdən, Irəvandan buranın sorağını eşidib,
tanış tapıb gələn oyunçular (xırda oyunçular) həmin otaqda kart, nərd oynayırdı,
aşıq, zər atırdı.
Lap dibdəki üçüncü kiçik otaqda isə içmiş alkoqoliklər, bəzən keflənib qalmış
müştərilər yıxılıb yatırdı. Qəbiristanlıq Idarəsinin əsas işçi qüvvəsi alkoqoliklər idi.
Bu adamların bir qismi qəbirqazan ştatında idi, qalan qismi isə ştatda deyildi.
Mirzəibi, Ağakərim, Vasili ölü sahibləri ilə danışıq aparırdı, qəbrin birinin
qazılmasının xərcini təyin edirdi. Bu üç nəfər qəbiristanlığa gəlmiş ölü sahibinin
imkanını o saat hiss edirdi və həmin imkandan asılı olaraq da pul tələb edirdilər –
aşağısı yüz manat, yuxarısı isə 300-350 manat (bəzən hətta 400 olurdu); bu hələ
ancaq qəbir qazmaq əməliyyatı idi... Işi isə alkoqoliklər görürdü. Ailələrindən
ayrılmış, dostlarına, qohumlarına yad olmuş bu adamlar, əslində, maaş almırdılar,
yalnız iş cədvəlinə qol çəkirdilər, maaşlar isə bir yerdə və bütün köpüyünə qədər
Əbdül Qafarzadəyə verilirdi. Alkoqoliklər qazdıqları hər qəbir üçün Ağakərimdən,
Mirzəibidən, Vasilidən – hansı onları çağırıb iş tapşırmışdısa – bir-iki manat
alırdılar, bir də ki, qırsaqqız olub ölü sahiblərindən bir arağın pulunu qoparırdılar.
Tülkü Gəldi Qəbiristanlığına lap yaxından bələd olanlar bilirdilər ki, gecələr
morqda qarovulçu Əflatunun vasitəsilə ikiqat, üçqat baha qiymətə nəşə də almaq
mümkündü və burasını da bilirdilər ki, nəşəni gətirən əsas adam Burundur.
Düz dörd il idi ki, Burun, qardaşı Gülbala ilə birlikdə iki aydan, üç aydan bir
Daşkəndə, oradan da Səmərqəndə uçurdu, orta məktəblərdə otuz ildən artıq fizika
dərsi deyən müəllim Sayzulla Mirzəmuhəmmədovdan əla növlü nəşə alırdı, Bakıya
qayıdıb o nəşəni beş-altı taksi sürücüsünün, məhəllədəki beş-altı cavanın vasitəsilə
satdırırdı və yol xərcindən, vasitəçilərə verdiyi puldan əlavə, orta hesabla min
manata üç min manat təmiz qazanc əldə edirdi. Müəllim Sayzulla
Mirzəmuhəmmədov on iki uşağın atası, dünyagörmüş, gülərüz, ağıllı və tədbirli bir
adam idi, hər dəfə Burun gələndə özü qollarını çırmalayıb gözəl özbək plovu
bişirirdi və düz dörd il idi ki, bu iki nəfərin arasında qarşılıqlı hörmət və etibar var
idi: nə Burun aldığı nəşəni tərəzidə çəkib yoxlayırdı, nə də müəllim Sayzulla
Mirzəmuhəmmədov aldığı pulu sayardı. Burun hər dəfə Səmərqənddən gətirdiyi
nəşənin xeyli bir hissəsini gecələr Tülkü Gəldi Qəbiristanlığında satdırırdı və həmin
nəşə alverindən gələn qazancın hər on manatından dörd manatı qəbiristanlığın
sahiblərinə (yəni dolayısı ilə Əbdül Qafarzadəyə) çatırdı. Xüsusi cidd-cəhd
göstərdiyi üçün hər on manatdan 30 qəpiyi də ayrıca qarovulçu Əflatunun payına
düşürdü. Qarovulçu Əflatun bir neçə dəfə burnunu çəkə-çəkə cəhd eləmişdi ki, öz
payını bir az artırsın, heç olmasa, hər on manatdan 40 qəpik götürsün, amma bu
cəhdlərdən heç bir şey çıxmamışdı, çünki Burun xəsis idi və qarovulçu Əflatun bu
barədə çəkinə-çəkinə bir söz deyən kimi, ağzından vururdu. Tülkü Gəldi
Qəbiristanlığındakı o nəşə alverindən götürülən qazancdan Ağakərimə, Vasiliyə,
Mirzəibiyə məbləği isə Əbdül Qafarzadə özü müəyyən edirdi və lazım bildiyi
vaxtlar onlara verirdi.
Gecələr taksi sürücüləri – təxminən on-on iki adam– kefinə içmək düşmüş
müştəriləri bura gətirirdilər, hərgah müştəri özü buranı tanımırdısa, maşından
düşmək istəmirdisə, taksi sürücüsü əvvəlcə müştəridən özünə üç manat götürürdü,
arağın qiymətini Qəbiristanlıq Idarəsinin darvazası ağzındakı keşikdə oturan
qarovulçu Əflatun deyirdi, misal üçün arağın şüşəsi 25 manata; pulu Əflatun
müştəridən alıb morqa gedirdi, 24 manat verirdi; çünki hər araqdan bir manat onun
özünə çatırdı, buna Əbdül Qafarzadə özü icazə vermişdi və arağı qəzetə büküb
gətirib müştəriyə ötürürdü. Qarovulçu Əflatun gecələr bura gələn taksi sürücülərini
tanıyırdı və xüsusi dəftərində hesab aparırdı: hər alınan araq şüşəsindən 1 manat 50
qəpik taksi sürücüsünün payına düşürdü (müştəridən aldıqları 3 manatdan əlavə);
taksi sürücüləri səhər iş vaxtlarını qurtarıb maşını qaraja sürməzdən əvvəl Tülkü
Gəldi Qəbiristanlığına baş çəkirdilər və onlara çatacaq məbləği də ya qarovulçu
Əflatundan, ya da Vasilidən, Ağakərimdən, Mirzəibidən alırdılar. Bu haqq-hesabda
hər şey dəqiq idi və demək olar ki, heç vaxt narazılıq, inciklik olmurdu – yay-qış
həmişə burnunu çəkə-çəkə araq dalınca qaçan, müştəriləri hörmətlə yola salan, taksi
sürücülərini gülərüzlə qarşılayan qarovulçu Əflatun dəftərdə yalnız özünün başa
düşəcəyi bir xətlə doğru-dürüst qeydlər aparırdı. Bu adam hələ müharibədən əvvəl
Əbdül Qafarzadəgilin məhəlləsində yaşamış, vaxtıyla Əbdül Qafarzadənin böyük
qardaşı Xıdırla oturub-durmuşdu, Bakının ilk tramvay sürücülərindən biri olmuşdu,
otuzuncu illərdə partiyaya keçmiş, orta məktəblərdən birinə təsərrüfat işləri üzrə
müdir müavini və ilk partiya təşkilatı katibi göndərilmiş, başqa bir məktəbdə müdir
işləmişdi, amma bundan sonra Əflatun müəllimin maarif sahəsindəki irəliləyişi
dayanmışdı, məktəbdə yeyintiyə yol verdiyi üçün partiyadan çıxarılmış, daha
sonralar yüngül fırıldaq üstündə iki dəfə həbs olunmuş, müharibə dövründə özünü
axsaqlığa vura-vura çayçı işləmiş, bir sözlə, həyatın hər üzünü görmüşdü və nəhayət
ki, çətin yaşanmış o uzun-uzadı illərdən sonra gəlib Əbdül Qafarzadəni tapmışdı və
daha on ildən artıq idi ki, canla-başla kişiyə xidmət edirdi, həyatından da razı idi; o
qədər razı idi ki, hətta mətbəədə linotipçi işləyən böyük oğlu Kolxoza «Jiquli»
maşını almağa söz vermişdi.
Dava-mərəkə hərdənbir qumar gedən otaqda başlamaq istəyirdi, çünki burada
bəzən ortalıqda oynanan pulun miqdarı 10-15 min manata qalxırdı, əsəblər
gərginləşirdi, amma Burun qoymurdu ki, dava qızışsın. Burun gecələri taksidən çox,
morqdakı qumarxanada keçirirdi və onun buradakı nüfuzu tamam sözsüz idi.
Əlbəttə, Əbdül Qafarzadə özü gecələr bir dəfə də olsun ayağını Qəbiristanlıq
Idarəsinə basmamışdı və hər həftənin cümə günü ya Ağakərim, ya Vasili, ya da
Mirzəibi Tülkü Gəldi Qəbiristanlığının gecə həyatından Əbdül Qafarzadəyə çatacaq
bir həftəlik məbləği gətirib verirdi və bu məbləğ az olmurdu: qumarxanadakı kiçikliböyüklü
bütün uduşun 7%-i yer sahibi kimi Əbdül Qafarzadəyə çatırdı, arağın da
qazancının hər on manatından altı manatı ona verilirdi. Bu məbləğ də dəqiq
hesablanırdı, çünki Ağakərim də, Vasili də, Mirzəibi də çox yaxşı bilirdilər ki, bircə
manat da səhv eləsələr (aldatmaqdan söhbət gedə bilməzdi!), Əbdül Qafarzadə bunu
o saat biləcəkdi– Tülkü Gəldi Qəbiristanlığındakı qəbir daşları da, elə bil ki, Əbdül
Qafarzadənin gizli casusları idi.
Bütün bunlara baxmayaraq, morqdakı bu gecə həyatı Əbdül Qafarzadənin
ürəyincə deyildi və gecə-gündüz həmişə oyaq olan fəhmi ona deyirdi ki, bu araq
alverinin, qumarın, nəşəxorluğun əvvəl-axır zibili çıxacaq. Düzdü, bilavasitə Əbdül
Qafarzadənin özü ilə bağlı heç kim heç nə sübut edə bilməzdi, amma, hər halda,
ömründə heç vaxt onu aldatmayan fəhmi morqdakı bu gecə həyatını qəbul etmirdisə,
deməli, buna ehtiyac yox idi və günlərin bir günündə Əbdül Qafarzadə Ağakərimi
də, Vasilini də, Mirzəibini də kabinetinə çağırıb morqun gecə həyatını – qumarı da,
nəşəni də qadağan elədi (araq alverini isə hələlik saxlamışdı).
Gözləri bərələ qalmış Ağakərim də, Vasili də, Mirzəibi də ağızlarını açıb bir
kəlmə söz deyə bilmədilər, çünki bunun heç bir mənası yox idi. Əbdül Qafarzadə
həmişə yüz ölçüb bir biçirdi, sözü ki, dedi,qurtardı, burada ikinci bir söhbət ola
bilməzdi.
Burun bu xəbəri eşidəndə özündən çıxdı, Ağakərimi də, Vasilini də,
Mirzəibini də söyüb biabır elədi, hədələdi və bu adamların yalvarıb-yaxarmaqlarına
baxmayaraq, günorta, qardaşı Gülbala ilə birlikdə Əbdül Qafarzadənin kabinetinə
girdi.
Burunun əsl adı Soltanmurad idi, amma burnu həddən artıq böyük olduğu
üçün ləqəbinə çevrilmişdi. On səkkiz yaşındaikən adam öldürmüş, on beş il həbsdə
yatmış, sonra günün günorta çağı əmanət kassasını qarət etdiyinə görə yenidən on
beş il həbsə məhkum olmuş və bu müddətin də on ilini yatıb çıxmış bu adam
Bakının bütün yuxarı məhəllələrində məşhur idi. Həmin məhəllələrin «blatnoy»
cavanları arasında ən etibarlı andlardan biri Burunun canı idi: «Soltanmurad canı!»
Həbsdən qayıdandan sonra Burun taksi sürücüsü işləyirdi, amma onun
taksidən götürdüyü qazanc Tülkü Gəldi Qəbiristanlığındakı gecə həyatından
götürdüyü qazancın heç onda biri də deyildi.
Burunun kiçik qardaşı Gülbala təxminən iki metr boyu, yüz əlli kilo da çəkisi
olan keçmiş boksçu idi və o da taksi sürürdü. Qardaşlar təkcə taksi sürücüləri
arasında yox, ümumiyyətlə, şəhərin sex və restoran müdirlərindən tutmuş, milis
işçilərinəcən camaatın arasında tanınan adamlar idi. Burunun sədəf rəngli «Qaz-
24»ü də Bakının küçələrində öz sahibindən az məşhur deyildi.
Əbdül Qafarzadə kabinetində tək idi və onda da indiki kimi qəzetləri beləcə
dəstəçin yığıb oxumaqla məşğul idi.
Burun özündən xeyli hündür və canlı qardaşını əli ilə kənara itələdi və düz
Əbdül Qafarzadənin qabağına yeridi:
– Bağlayırsan morqu, hə?
Əbdül Qafarzadə əlindəki qəzeti mizin üstünə qoydu. Buruna baxdı, qardaşı
Gülbalaya baxdı, sonra başını tərpətdi, yəni ki, hə, bağlayıram və ürəyində də
fikirləşdi ki, dünyanın qəribə işləri var, iki doğma qardaşdı, amma birinin burnu o
boyda, o birisinin isə özü zırpı, burnu adi burun.
Burun hirsdən oynayan gözləri ilə Əbdül Qafarzadəyə baxa-baxa və dərisi
qaralıb codlaşmış boğazının iri damarları şişə-şişə:
– Bilirsən mən kiməm?! – qışqırdı.
Əbdül Qafarzadə gözlərini qarşısında dayanmış əlli dörd-əlli beş yaşlı bu
dəlisov adamdan çəkməyərək altındakı kürsünü düzəldib yerini rahatladı,
dirsəklərinin ikisini də mizin üstünə qoydu, əllərini bir-birinə sürtüb:
– «Domal» bilirsən nədi?– soruşdu.
Burun:
– Yox! – qışqırdı.
Əbdül Qafarzadə həmişəki kimi aram-aram:
– Hardan biləsən? Evdə bişməyib, qonşudan gəlməyib!.. – dedi. – Özü də çətin
tapılır. QDR buraxır. Itə-qurda gərək ağız açasan ki, bir yeşik göndərsin evə...
Paraşokdu. Zaxodu-zadı yuyurlar onuynan. Bax, Soltanmurad, – Əbdül Qafarzadə
diqqətlə Burunun gözlərinin içinə baxdı. – səni elətdirərəm o cür paraşok! O yekə
burunun var a, sən öləsən, onu da ət maşınından keçirtdirib yedirdərəm arvaduva,
uşaqlaruva!..
Burunun ürəyi az qalırdı sinəsindən qopub çıxsın və bu dəqiqə o öz doğma
anasını da öldürərdi, amma indi yerindən tərpənə bilmirdi, ağzını açıb bir söz də
deyə bilmirdi, çünki bu dəm Soltanmurad Əbdül Qafarzadənin çeşməyin ardından
diqqətlə baxan boz gözlərində elə bir soyuqluq hiss edirdi ki, bu soyuq ömrünün
çoxunu həbsxanalarda keçirmiş, kriminal aləmdə canavar hesab olunan bu adamın
bütün içini birdən-birə üşütməyə başlamışdı; Soltanmurad təkcə duyğuları ilə yox,
bütün bədəni ilə hiss edirdi ki, yumşaq kürsüdə oturub mizə dirsəklənmiş bu boz
gözlü, qara qalstuklu, eynəkli adam dediklərinin hamısını indicə yerinə yetirdə bilər.
Ağappaq ağarmış və hirsindən yerində, az qala, uçunan Gülbala, elə bil, birdən
özünə gəldi, Əbdül Qafarzadəyə tərəf yerimək istədi, amma Burun gözlərini Əbdül
Qafarzadədən çəkməyərək əli ilə qardaşını saxladı və təkcə:
– Baxarıq!.. – deyə bildi, sonra sərt hərəkətlə geri dönüb qardaşını da ardınca
çəkə-çəkə kabinetdən çıxdı.
Həmin hadisədən sonra Burun daha Tülkü Gəldi Qəbiristanlığında görünmədi,
amma aradan təxminən iyirmi-iyirmi beş gün keçmiş köhnə «Inturist»in
restoranında təsadüfən Vasili ilə rastlaşdı, özünü saxlaya bilməyib cavan qızın
yanında (Vasili restorana növbəti cavan və gözəl bir qızla gəlmişdi) Vasilinin başına
yarımçıq bir şüşə konyak boşaltdı, konyakdan yaşarmış sifətinə də bir dənə yağlı
sillə şəkdi. Burun öz aləmində Əbdül Qafarzadədən intiqamını bu cür aldı.
Əlbəttə, Əbdül Qafarzadə bu restoran əhvalatından o saat xəbər tutdu və iki
gündən sonra, axşamüstü Burunun sürdüyü taksiyə dörd nəfər cavan oğlan oturdu,
maşını Zuğulbaya tərəf sürdürdü, Bakıdan bir az aralanmış maşını saxlatdırdı, dördü
də Burunun üstünə düşüb onu huşunu itirənəcən döydülər, sonra da şalvarını
çıxardıb çıxıb getdilər. Həmin axşamın səhəri o şalvarı bayraq kimi Burunun
yaşadığı evin küçə qapısının üstündən asmışdılar və məhəllənin bütün cavanları,
arvad-uşaq – hamı küçədə asılmış o şalvarı görmüşdü.
Bundan sonra Burun da, Gülbala da üç dəfə Əbdül Qafarzadəyə hücum etmək
istəmişdilər, amma hər dəfə də elə bir rüsvayçılıqla geri çəkilmişdilər ki, həmin
rüsvayçılıq Əbdül Qafarzadəyə ləzzət vermişdi, ürəyi darıxan vaxtlar yadına
düşəndə kefi kökəlmişdi. Sonra bir müddət görünməmişdi, amma günlərin bir günü
Əbdül Qafarzadənin kabinetinin qapısı açıldı və Burun içəri girdi:
– Mənə kömək elə, Əbdül qədeş!
Məlum oldu ki, Səmərqənddəki fizika müəllimi Sayzulla Mirzəmuhəmmədov
Burunu elə aldadıb və Burunun başına elə bir iş açıb ki, indi Burun çapalayır, o işin
altından çıxa bilmir.
Və Əbdül Qafarzadə Buruna kömək elədi.
Əbdül Qafarzadə eləcə kömək əlini uzadandan sonra Burun əlində bir qəzet
bükülüsü kişinin kabinetinə girdi ki, hörmətini bildirsin və hədiyyə versin. Əbdül
Qafarzadə isə boz gözləriylə çeşməyinin altından o qəzet bükülüsünə ötəri bir nəzər
salıb:
– Lazım deyil... – dedi. – Bayramlarda təbrik eləyərsən...
Onda Novruz bayramının ərəfəsiydi və həmin vaxtdan etibarən Burun bütün
Novruz bayramlarında Əbdül Qafarzadəni hədiyyə ilə təbrik etməyə başladı. Bir
dəfə isə Əbdül Qafarzadə Ağakərimi yanına çağırtdırdı:
– Novruz bayramından başqa bayram yoxdu, bəyəm? Burun sovet adamı
döyül? 7 Noyabr var, 1 May var, Konstitusiya günü var... Mən yuxarıları təbrik
eləyirəm, amma bu özünü elə aparır ki, elə bil, Iranda yaşayır, Xomeyninin bacısı
oğludu, Novruzdan başqa bayram tanımır... Iki yüz milyondan çox sovet adamı
necə, Burun da elə!.. Get çatdır ona!
Bundan sonra Burun Əbdül Qafarzadəni bütün bayramlarda təbrik edirdi və
Əbdül Qafarzadə də o hədiyyələri gülümsəyə-gülümsəyə xüsusi bir ləzzətlə qəbul
edirdi. Bu gözəl və ləzzətli iş o yerə gəlib çıxmışdı ki, Əbdül Qafarzadə ilə nəşə
davası eləyən Burun indi onun yanında siqaret çəkməyə cəsarət etmirdi ki,
hörmətsizlik olar.
Əbdül Qafarzadə Ağakərimə tapşırdı və morqu hərəsindən ayı 70 manata altı
tələbəyə – hər otaqda iki nəfər – kirayə verdilər. Uzaq kəndlərdən gəlib Bakıda
texnikumda oxuyan bu tələbələr sakit adamlar idi və Ağakərim, Mirzəibi, Vasili iş
çox olanda həmin tələbələrə də alkoqoliklər kimi pulsuz qəbir qazdırırdılar.
Tələbələr hər ay 420 manat pulu qarovulçu Əflatuna verirdilər
(kirayənişinlərin məsuliyyəti qarovulçu Əflatunun boynunda idi, yəni işdi-şayət, bu
kirayənin üstü açılsaydı, cavabdeh Əflatun idi, Əbdül Qafarzadənin isə, əlbəttə, bu
işdən xəbəri yox idi) və Əflatun da o pulu gətirib verirdi Əbdül Qafarzadəyə. Əbdül
Qafarzadə bu pulun 20 manatını qarovulçu Əflatuna verirdi (qarovulçu Əflatun da
həmişə eyni sözlərlə o pulu alıb cibinə qoyurdu: «–Allah səni, o adı nədi, şey, bizim
başımızın üstündən əskik eləməsin!.. Allah sənin cibinə o adı nədir, şey, min bərəkət
versin!.. Biz də sənin kölgəndə dolanırıq!..»), qalanını özü götürürdü. Əlbəttə, ayda
dörd yüz manat Əbdül Qafarzadə üçün bir şey deyildi, amma hər şeydə gərək qaydaqanun
və dəqiqlik olaydı; bir də ki, Əbdül Qafarzadə böyük pullar qazandığı üçün,
kiçik məbləğlərdən imtina edən adam deyildi – hər məbləğin öz yeri və öz qiyməti
var.
Həmin aprel günü Əbdül Qafarzadə əvvəlcə Fərid Kazımlının, sonra da
Burunla qardaşını yadına saldı, qollarını geniş açıb ləzzətlə gərnəşdi, gülümsədi,
zəngi basıb o cavan və gözəl katibə qızı çağırdı və katibə qız içəri girəndə Əbdül
Qafarzadə on gündə birinci dəfə bu qızı təpədən-dırnağacan əməlli-başlı nəzərdən
keçirdi, sonra:
– Vasilini çağır bura... – dedi.
Əbdül Qafarzadənin nəzərləri altında qıpqırmızı qızarıb pörtmüş o katibə qız
heç bilmədi ki, kabinetdən necə çıxdı; ömründə heç vaxt və heç kim ona beləcə
açıq-saçıq baxmamışdı; eyni zamanda Əbdül Qafarzadə bu qıza elə baxırdı, elə bil,
bazarda qarpıza, ya yemişə baxırdı ki, alandan sonra içi necə çıxacaq...
Qəbiristanlıq Idarəsində işləyən qadınların, demək olar ki, hamısı öz işlərinin
gözəl mütəxəssisləri olmaqla bərabər, həm də bir qadın kimi gözəl idilər. Makinaçı
Bədurə xanımdan tutmuş baş mühasib Yevdokiya Stanislavovnayacan, bu qadınları
Əbdül Qafarzadə özü bir-bir seçib işə götürmüşdü. Düzdü, bu qadınların bəzisi daha
qocalmışdı, amma buna baxmayaraq, Əbdül Qafarzadə onları işdə saxlayırdı və
həmişəki kimi də hörmət edirdi; həmişəki kimi– yəni cavan vaxtlarında olduqları
kimi; bu qadınların hər biri öz vaxtında Əbdül Qafarzadənin sevimli qadınları
olmuşdu...
Bir dəfə fasilə zamanı qadınlar bir yerdə oturub evdən gətirdikləri naharı
yedikləri zaman baş mühasib Yevdokiya Stanislavovna, nədənsə, birdən-birə xəyala
dalmışdı, göy gözləri dolmuşdu, dərindən köksünü ötürüb: «– Abdul vsex nas
nadul...» – demişdir. Kassir Marqarita Iosifovna isə baş mühasibin sözlərinə belə
düzəliş vermişdi: «– Abdul vsyu Sovetskuyu vlast nadul!..» Nə isə... Bütün bunlar
Tülkü Gəldi Qəbiristanlığının mətbəx söhbətləri idi...
Əbdül Qafarzadə Vasili Mitrofanovu Rostovda yaşayan dostlarının zəmanəti
ilə işə götürmüşdü və Vasili də qoca anası ilə birlikdə Rostovdan köçüb Bakıya
gəldiyi, Qəbiristanlıq Idarəsində işlədiyi bu on iki ildə həmin zəmanəti yüz faiz
doğrultmuşdu. Göygöz, sarışın, arıq, yaraşıqlı və ilk baxışda sadəlövh görünən bu
oğlan Əbdül Qafarzadənin bircə təbəssümündən, bircə baxışından kişinin nə
istədiyini başa düşürdü və elə buna görə də Əbdül Qafarzadəyə bəlkə də ən yaxın
adam idi (əlbəttə, ailə üzvlərindən başqa: ümumiyyətlə, yer üzündəki adamlar Əbdül
Qafarzadə üçün iki yerə bölünürdü: ailə üzvləri, yəni Qaratel, Sevil, Ömər, balaca
Əbdül (əvvəllər o yazıq Orduxan!..), bir də ki, qalan bütün insanlar).
Əbdül Qafarzadə Vasiliyə Bakıda ikiotaqlı mənzil almağa kömək etmişdi və
Vasili əntiqfiruş əşyalarla, gözəl rəngkarlıq əsərləri ilə xüsusi zövqlə bəzədiyi o
ikiotaqlı mənzildə təkcə anası ilə bir yerdə yaşayırdı. Hərdən o mənzil Əbdül
Qafarzadəyə lazım olurdu və o zaman Vasili evin açarını gətirib verirdi Əbdül
Qafarzadəyə, qoca anasını da götürüb Bakıdakı saysız-hesabsız dostlarının birinin
evinə gedirdi və yalnız Əbdül Qafarzadə sifariş göndərəndən sonra, öz mənzilinə
qayıdırdı – üç saatdan sonra, yaxud üç həftədən sonra...
Əbdül Qafarzadə Vasilinin şəklini, qabaqcıl bir fəhlə kimi, rayon əmək
qabaqcıllarının fəxri lövhəsinə vurdurmuşdu və ümumiyyətlə, cürbəcür zəfər
raportlarında, məruzələrdə, hətta mətbuatda Vasilinin adı tez-tez nümunə çəkilirdi,
iki dəfə medal almışdı və indi Əbdül Qafarzadə onu ordenə təqdim etmək istəyirdi.
Əbdül Qafarzadə hərdənbir kefinin kök çağlarında gülə-gülə Vasiliyə deyirdi:
«Hayıf adın qəbirqazandı də!.. Bizdə qəbirqazana qiymət qoyan yoxdu.., başqa işdə
işləsəydin, doroqoy, lap dəllək də olsaydın, indi səni geroy eləmişdim, bütün ölkə
indi səndən danışırdı! Vallah, səni lap deputat eləyərdim! Neyniyim? Qəbiristanlığın
üzü qara olsun!..»
Düzdü, Əbdül Qafarzadə Vasilini Sosialist Əməyi Qəhrəmanı eləməmişdi,
deputat da eləməmişdi, amma onu partiyaya keçirmişdi və bir müddətdən sonra
Qəbiristanlıq Idarəsi ilk partiya təşkilatının katibi seçilmişdi – fəhlə, özü də ki, rus–
həm sarsılmaz xalqlar dostluğuna bir nümunə idi, həm də ki, Əbdül Qafarzadənin
sədaqətə verdiyi qiymət idi.
Vasili Mitrofanov Rostovda bəzi vəzifəli və pullu adamların eyş-işrət
məsələlərinin yüksək səviyyəli təşkili ilə özünə pul qazanırdı (və az da qazanmırdı!).
Bakıya gələndə Tülkü Gəldi Qəbiristanlığının gündüz və gecə həyatına bələd
olandan sonra buradakı əlverişli şəraiti o saat düzgün qiymətləndirə bildi və bir
müddət əvvəlki peşəsindən istifadə etməyə başladı, tanış qızları vaxtaşırı Rostovdan
Bakıya qonaq dəvət elədi, Bakıdakı fahişələrlə işgüzar əlaqəyə girdi və gecələr
Tülkü Gəldi Qəbiristanlığına gələn müştərilər araq, yaxud nəşə almaqdan başqa,
Vasiliyə müəyyən miqdarda (bu baxırdı fahişəyə və müştəriyə!) pul verib (bu pulun
altmış faizi fahişəyə, qırx faizi isə Vasiliyə çatırdı), özü ilə bir gecəlik fahişə apara
bilərdi (fahişə əlavə olaraq müştəridən nə qoparacaqdı – bu onun öz işi idi və baxırdı
həmin fahişənin səriştəsinə və bacarığına!), amma Vasilinin get-gedə qızışan bu
fəaliyyəti uzun çəkmədi, Əbdül Qafarzadə Tülkü Gəldi Qəbiristanlığına fahişə
gətirməyi və ümumiyyətlə, Vasilinin belə axmaq bir işlə məşğul olmağını qəti
qadağan etdi.
Vasili bir daha Tülkü Gəldi Qəbiristanlığına fahişə gətirmədi, amma Bakıda,
Bayıl tərəfdə yaşayan və anaşaya öyrənmiş bəzi cavan rus qızlarından istifadə
etməyə başladı: həmin qızları anaşa ilə təmin edirdi və onları Azərbaycanın
rayonlarında, eləcə də qonşu Gürcüstanın, Ermənistanın, Dağıstanın rayonlarında,
Krasnodar və Rostov vilayətlərində işləyən pullu kolxoz sədrlərinin, sovxoz
müdirlərinin, rayon səviyyəli rəhbər partiya və sovet işçilərinin müvəqqəti
istifadəsinə verirdi. O rayon xadimləri məzuniyyətə çıxıb Kislovodskda, Soçidə,
Yurmalada sanatoriyaya gedirdilər və qızlar da Vasilidən bir aylıq anaşalarını
(bəziləri morfiyə, kokainə keçmişdi və Vasili də onların qarasına deyinə-deyinə
anaşadan xeyli baha olan bu narkotikanı tapıb almağa məcbur olurdu) alırdılar, o
rayon xadimlərinin hesabına Kislovodskda, Soçidə, Yurmalada sanatoriyalara yaxın
gözəl evlərdə kirayə qalırdılar, qəyyumlarına kef verirdilər, təzədən Bakıya
qayıdırdılar, Vasili bu qızlardan da haqq alırdı, o möhtərəm rayon xadimlərindən də;
qızlar özləri də pis qazanmırdılar.
Əbdül Qafarzadə belə hesab edirdi ki, kişi olan kəs işlərini gərək elə qursun,
fahişədən asılı olmasın: ümumiyyətlə, o işə ki, arvad qarışdı (özü də ki, fahişə!),
onda o işin axırı olmaz! Buna görə də Vasili Mitrofanov Tülkü Gəldi
Qəbiristanlığının işlərindən başqa, burada yalnız Əbdül Qafarzadənin özünün intim
işlərinin vasitəçisi və təşkilatçısı idi.
Vasili, Əbdül Qafarzadəyə bu dərəcədə məhrəm adam olsa da, həmişə öz
yerini bilirdi, bu məhrəmlikdən sui-istifadə etmirdi, kişinin yanında siqaret də
çəkmirdi (əlində siqaret olsaydı, Əbdül Qafarzadəni görən kimi, siqareti arxasında
gizlədirdi), içki də içmirdi və Əbdül Qafarzadə də bunu yüksək qiymətləndirirdi,
özünün ezamiyyət məsələlərini Vasiliyə həvalə edirdi.
Əbdül Qafarzadə başqa şəhərlərə ezamiyyətə, əsasən, iki məsələ ilə bağlı
gedirdi: ya məhəbbət məsələlərinə görə, ya da ki, qumara (işgüzar məsələləri,
əsasən, Bakıda həll edirdi. SSRI-nin başqa şəhərlərində yaşayan dostlara ehtiyac
olanda, onları Bakıya dəvət edirdi). Çoxdan idi qumar oynamırdı və məsələ onda
deyildi ki, sonuncu dəfə qumar toplantısına gedəndə (Riqaya yığışmışdılar) bir
gecədə yüz on min manat nəqd pul uduzmuşdu – qumar, qumardır və qumar
oynayan kəs udmağı bacardığı kimi, uduzmağı da bacarmalıdır; məsələ onda idi ki,
daha əvvəlki oyunçular yox idi, çoxu ölmüşdü, kimisi öldürülmüşdü, kimisi sovet
vətəndaşlığından çıxıb Israil adı ilə xaricə getmişdi və indi soraqları ABŞ-dan, AFRdən,
Italiyadan, Türkiyədən, Yunanıstandan, elə Israilin özündən gəlirdi...
Vaxtıyla Moskvada, Leninqradda, Tiflisdə, Daşkənddə, Irəvanda, Tallində,
başqa şəhərlərdə yaşayan bu adamlar sanballarına görə, yəni yalnız pullarının
çoxluğuna görə yox, təmkinləriylə (ağır oturub batman gəlirdilər!), tədbirləriylə,
özlərini aparmaqlarıyla Əbdül Qafarzadəyə bab idilər, gədə-güdə deyildilər, xırdaxuruş
oğurluqla işləri olmazdı, amma indi o dünyagörmüş kişilərin yerini ağzından
süd iyi gələn adamlar tutub və düzdü, bunların pulları əvvəlkilərdən də artıqdır,
amma özləri bir qara qəpiyə dəyməzlər. Bu yeni nəsil daha böyük əraziləri idarə
edirdi, yəni həmin ərazilərin bir partiya-sovet rəhbərliyi var idi, bir də ki, yüngül
sənaye zavod fabriklərini, ticarəti, iaşə və məişət xidmətini, narkotika alverini,
fahişəliyi əllərinə almış həmin gizli rəhbərlik, bəzən isə gizli rəhbərliklə rəsmi
rəhbərlik arasında da yaxşı bir əlaqə yaranırdı; bunlar belə idi, amma yeni nəsil
tamam cırtqoz adamlardan ibarət idi. Əlbəttə, köhnə dostlardan da salamat qalanlar
(Əbdül Qafarzadə kimi!) az deyildi, amma qocalırdılar... Hərdən bu barədə
fikirləşəndə Əbdül Qafarzadə öz-özünə gülümsəyirdi, çünki bütün sovet qəzetləri,
radio-televiziya səhərdən axşamacan mənfur kapitalist ölkələrindəki mafiyadan
yazırdı, deyirdi, göstərirdi və bəzən elə həmin qəzetlərin özündə Orta Asiyadan
hansı bir Sosialist Əməyi Qəhrəmanı, kolxoz sədrininsə, yaxud Rostov vilayətindən,
Pribaltika respublikalarından hansı bir görkəmli təsərrüfat rəhbərininsə haqqında
təriflərlə dolu yazılar dərc edilirdi və bu həmin Sosialist Əməyi Qəhrəmanı, həmin
təsərrüfat rəhbəri olurdu ki, Əbdül Qafarzadə şəxsən onunla Odessada, yaxud
Irəvanda, yaxud Kislovodskda qumar oynamışdı, işgüzar məsələlər həll eləmişdi...
Yeni nəslin həyat tərzi qətiyyən Əbdül Qafarzadənin xoşuna gəlmirdi və buna
görə də daha qumara getmirdi, işgüzar əlaqələr isə, əlbəttə, əvvəlki kimi qalmışdı.
Bu cavan adamların gündəlik güzəranının zahiri cəhətləri: içdikləri viski də,
yanlarında gəzdirdikləri qəhbələri ən son dəblə geyindirməkləri və qaş-daşla
bəzəmələri də, özlərinin nəşə çəkməsi, morfi vurdurması da, hər dəfə restoranda
yeyib-içəndən sonra xörəkpaylayanlara yüz manat, iki yüz manat artıq pul
verməkləri də, daha heç nədən çəkinməyib açıq-aşkar malikanələr tikdirməkləri,
camaatın gözü qabağında şəxsi «Mersedes» lərində gəzməkləri də Əbdül
Qafarzadənin ürəyincə deyildi. Partiya və sovet işçiləri, respublikaların, vilayətlərin,
şəhərlərin rəhbərliyi, inzibati orqan işçiləri nə qədər rüşvət alsalar da, hər halda, bu
yeni nəsil nümayəndələri kimi, gəmidə oturub gəmiçiyə bu qədər açıq-aşkar meydan
oxumaq olmazdı və Əbdül Qafarzadənin fikrincə, elə ola bilərdi ki, bunun axırı
yaxşı qurtarmasın. Düzdü, dünyanın işlərini bilmək olmaz, amma belə görünür ki,
Brejnevin ömrünün sonuna az qalıb, qolundan tutub gəzdirirdilər, iclaslarda
danışanda da o qədər ağzını marçıldadırdı ki, adam heç nə başa düşmürdü. Tarix
göstərir ki, Sovet Ittifaqında birinci şəxsin əxlaqından və əqidəsindən çox şey
asılıdır. Brejnevdən sonra kim gələcəkdi? Əlbəttə, elə birisi gələ bilərdi ki, işlər lap
Brejnevin vaxtından da yaxşı getsin (və Əbdül Qafarzadə, əslində, əmin idi ki, elə
belə də olacaq! Bir cəmiyyətdə ki, bu dərəcədə bir söz deyib, başqa iş görürlər, onu
düzəltmək mümkün deyil, çünki dağıla bilər, buna görə də seçdiyi rəhbərlik özünə
bab olmalıdır!), amma şər deməsən, xeyir gəlməz, elə birisi də iş başına keçə bilərdi
ki (buna Sovet Ittifaqı deyərlər – və tarix deyərlər!– nə desən, ola bilər!), aləmi
qatışdırsın bir-birinə... Düzdü, Əbdül Qafarzadə dünyada heç nəyə inanmasa da,
pulun gücünə yüz faiz inanırdı, amma, hər halda, o cür ki, bu yeni nəsil özünü
aparır– düz deyildi, qəti düz deyildi!
Əvvəllər Moskvadan tutmuş Xersonacan ölkənin cürbəcür şəhərləri ilə
zəngləşərdilər, bir yerə yığışardılar və o zaman qumar da, eyş-işrət də, kef məclisləri
də, əslində, bir bahənə olardı, çünki əsas məqsəd başqa idi: bir-birilərinə fikir
söyləyərdilər, məsləhət verərdilər, kömək əli uzadardılar, bir-birilərini öz işləri ilə
tanış edərdilər və gələcək işgüzar görüşləri hazırlayardılar... Indi isə məqsəd
qumarın özüdür, kefin özüdür, çünki pulu çox qazanırlar, əvvəlkindən asan
qazanırlar, rüşvəti də çox verirlər, çünki alan da çoxdur. Əvvəllər o kişilərin oturubdurduqları
adamlar professorlar olurdu, görkəmli artistlər, bəstəkarlar, rəssamlar,
yazıçılar olurdu, məşhur həkimlər olurdu... Düzdü, bu yeni nəslin də əlinin altında
(!) professorlar, rəislər, nazirlər var idi, amma iş burasında idi ki və Əbdül
Qafarzadə günlər keçdikcə buna daha artıq dərəcədə əmin olurdu ki, indiki bu
professorların, bu vəzifə sahiblərinin özləri də cırlaşıblar və cırlaşmaqda da davam
edirlər, əvvəlki kişilər yox idi...
... Vasili içəri girəndə Əbdül Qafarzadə gözünü qəzetdən çəkib:
– Moskvaynan danış, – dedi. – Qastinisada iki nəfərlik yer lazımdı sabaha.
Vasili, təəccüb etdi və təmiz Azərbaycan dilində (dil öyrənməyə, görünür,
xüsusi istedadaı var idi, Əbdül Qafarzadənin dəvəti ilə Bakıya köçəndən bircə il
sonra, azərbaycanca təmiz danışırdı) soruşdu:
– Moskvaya gedirsiz, Əbdül Orduxanoviç?
Əbdül Qafarzadə Fərid Kazımlının baldızı oğlunun qarasına üz-gözünü
turşudub:
– Yox, – dedi, – tanış adamlar gedir.
– Lyüks olsun, Əbdül Orduxanoviç?
– Olsun də... – Əbdül Qafarzadə çeşməyini gözündən çıxarıb dəsmal ilə
şüşəsini təmizləyə-təmizləyə yüngülcə gülümsədi. – Xalası ərinin pulu çoxdu...
Vasili, Əbdül Qafarzadənin bu sözlərindən heç nə başa düşmədi, amma heç nə
başa düşməyəndə də sual verib belə şeyləri aydınlaşdırmaq Vasilinin xidmət üsuluna
daxil deyildi, buna görə də həmişəki kimi:
– Başqa bir şey lazım deyil, Əbdül Orduxanoviç? – soruşdu.
– Yox, daraqoy. Ancaq sənin sağlığın lazımdı.
– Çox sağ olun. Mən gedə bilərəm, Əbdül Orduxanoviç?
– Get məşğul ol, daraqoy, axşam evdə olacağam, zəng elə, mənə de.
– Baş üstə.
Vasili kabinetdən çıxdı, amma o Moskva söhbətindən sonra Vasilinin
kabinetdən çıxması ilə otağa qəribə bir yaz ab-havası doldu və Əbdül Qafarzadə,
əlbəttə, bu yaz ab-havasını o saat hiss etdi, duydu, tanıdı; o yaz ab-havası xatirədə də
təzə, təravətli qalmışdı və birdən-birə yada düşən o xatirələr yenə də o gözəl
günlərdəki kimi, kişinin içinə bir cavanlıq həvəsi gətirdi, elə bil ki, bütün
qayğılarını, dərdini-sərini götürüb apardı, təzə hisslər, təzə duyğular baş qaldırdı.
Düzdü, Rozanın o balıq kimi sürüşkən bədəni birdən-birə sürüşüb qucağından çıxdı,
amma o yaz təravətli təzə hissləri, təzə duyğuları özü ilə aparmadı, o hisslər, o
duyğular həmişəlik Əbdül Qafarzadə ilə qaldı və hərdən beləcə qəflətən yada
düşürdü.
Rozanın iyirmi səkkiz yaşı var idi, yəni keçən yaz – o gözəl, o unudulmaz,
hərdən yada düşüb adamın qanını qaynadan o yaz çağlarında – iyirmi səkkiz yaşı var
idi və ömründə çox qadınlar görmüş Əbdül Qafarzadə bilirdi ki, Rozanın əsl
sevilməli vaxtıdı, beş ildən sonra, hətta üç ildən sonra, daha gec olacaq, Roza indiki
Roza olmayacaq. Əbdül Qafarzadə Rozanı birinci dəfə görəndə bu qadının bədənini
necə təsəvvür etmişdisə, Rozanın bədəni, doğrudan da, o cür idi, Rozanın ağappaq,
hamar və sağlam bədəni, dolu baldırları, qarnının dərininə çəkilmiş göbəyi, dingding
dingildəyən, canlı və həmişə isti, hərarətli döşləri başdan-başa bir xoşbəxtlik idi
və bu xoşbəxtlik keçən yaz Əbdül Qafarzadə kimi bir adamın belə, az qalmışdı
ağlını başından çıxarsın. Roza özü də yaxşı bilirdi ki, indi ömrünün hansı çağıdır,
bilirdi ki, beş ildən sonra, əlbəttə, gözəlliyini saxlayacaq, yəqin şövqünü, həvəsini də
saxlayacaq, amma daha indiki Roza olmayacaq və Roza adamın ağlını başdan
çıxarmağı bacarırdı.
Roza Səkkizinci kilometrdə, köhnə üçmərtəbəli bir bina ilə üzbəüz əmanət
kassasında işləyirdi, tanış-bilişlərinin arasında Bakının nəinki Səkkizinci kilometrdə,
ümumiyyətlə, ən gözəl qadınlarından biri hesab olunurdu və onunla ilk dəfə Vasili
özünün saysız-hesabsız məclislərindən birində tanış olmuşdu. Vasili bu qadının
gözəlliyini, işvəsini o saat qiymətləndirmişdi və buna görə də onu özünə yox, Əbdül
Qafarzadəyə layiq bilmişdi; Rozanın gözəlliyi, işvəsi o qədər təsirli idi ki, hətta
şeytan, Vasili Mitrofanovu yoldan çıxarmaq istədi, bu cavan adam Əbdül
Qafarzadəyə xidmət etdiyi bütün bu müddət ərzində ilk dəfə az qaldı «xəyanət»
yoluna düşsün. Vasili Əbdül Qafarzadənin zövqünə bələd idi və tamam əmin idi ki,
Əbdül Qafarzadə bu qadına bir könüldən min könülə aşiq olacaq və Vasili burasını
da çox yaxşı bilirdi ki, beləcə aşiq vaxtlarında Əbdül Qafarzadə pula pul demir;
Vasili Roza ilə əlbir ola bilərdi, Əbdül Qafarzadədən qoparılacaq qazancı bu qadınla
yarıbayarı bölərdi və əlbəttə, qazanc da həmişəkindən çox olardı (çünki Vasili
Mitrofanov Əbdül Qafarzadəni xərcə salmağın ən incə yollarını belə yaxşı bilirdi və
Rozanın köməyi ilə bu yollardan gizlincə istifadə edərdi), amma Vasili çox
çətinliklə də olsa, özünü məcbur etdi və «– Lənət şeytana!»– dedi.
Roza kimsəsiz, tək adam idi və Vasilinin təklifinə yəqin ki, razı olardı, amma
Vasili bircə anlıq belə təsəvvür edəndə ki, Əbdül Qafarzadə bu «xəyanət»dən xəbər
tutar, cavan olmağına baxmayaraq, dünyanın çox üzünü görmüş və görmədikləri
barədə də nəzəri təsəvvürü olan bu adamın bütün içi uçum-uçum uçunurdu və həmin
qorxu hissi Vasilini məcbur etdi ki, bu dəfə də, həmişəki kimi, Əbdül Qafarzadəyə
sədaqətlə xidmət göstərsin, Roza ilə kişinin arasında sadiq bir vasitəçi olsun.
Əbdül Qafarzadə Rozanı görəndən sonra, bu qadınla Bakıda gizli və tələsik
görüşmək istəmədi; əvvəlcə Vasili Moskvaya gedib hazırlıq gördü, sonra Roza
Moskvaya gəldi, sonra da Əbdül Qafarzadə gəldi və Əbdül Qafarzadə heç vaxt
ağlına da gətirə bilməzdi ki, canında hələ bu qədər gənclik ehtirası var imiş; Roza
Əbdül Qafarzadəni bir yeniyetmə oğlan kimi, təzədən ayıltmışdı. Son vaxtlar,
xüsusən, yazıq Orduxandan sonra Əbdül Qafarzadəyə elə gəlirdi ki, həyat daha
yaşanıb qurtarmaq üzrədir, amma keçən yaz Moskvadakı o Rozalı günlər, elə bil,
kişini təzədən yeni bir həyata qaytardı, o Rozalı günlər otuz il bundan əvvəlki
hisslərin, həyəcanların yalnız xatirəsini, təəssüratını yox, o hisslərin, həyəcanların
özlərini qaytarıb gətirdi.
Roza milliyətcə aysor idi və elə anlar olurdu ki, boş vaxtlarında qədim
Assuriya haqqında çox kitablar oxumuş Əbdül Qafarzadəyə elə gəlirdi, elə bil, iri
qara gözləri işım-işım işıldayan bu qadın Bakıdakı əmanət kassalarının birindən yox,
o qədim dövrlərdən gəlib onun ömrünə daxil olub.
Roza Moskvanın lap mərkəzindəki o üçotaqlı lüks mehmanxana nömrəsində
əyninə heç nə geymirdi, hil çeynəyə-çeynəyə (Əbdül Qafarzadənin hil iyindən xoşu
gəlirdi) otaqlarda çılpaq gəzirdi və çarpayıda uzanıb, yaxud kresloda oturub bu
sağlam, bu ehtiraslı qadına baxmaqdan doymayan Əbdül Qafarzadə heç vaxt heç
hansı pulla, heç hansı bir ziynətlə, daş-qaşla o dəqiqələrdə Roza ilə öyündüyü kimi,
öyünməmişdi, qürur hissi keçirməmişdi; həmin anlarda Roza, Əbdül Qafarzadənin
bütün ömründə əldə etdiyi ən qiymətli şəxsi əmlak idi.
Əbdül Qafarzadə istədiyi vaxt Sovet Ittifaqının istədiyi şəhərinə istədiyi
müddətə ezamiyyət götürürdü, həmin Moskva səfərini də on beş günlük nəzərdə
tutmuşdu və o on beş günün birinci beş günü gecəli-gündüzlü bütöv bir an –
hisslərlə, həyəcanlarla dolu nəhəng bir an kimi ötüb keçdi, həmin beş gündə nə
Əbdül Qafarzadə, nə də Roza o üçotaqlı lüks nömrədən çıxdılar, heç restorana da
getmədilər (ümumiyyətlə, təbiəti etibarilə xudmaniliyi xoşlamayan Əbdül
Qafarzadənin restoranlarda oturmaqla arası yox idi və o beş gündə Roza heç imkan
tapıb əmisi Asatura zəng də eləyə bilməmişdi).
Rozanın ən işıqlı, ən hərarətli uşaqlıq xatirələrindən biri və bəlkə də birincisi
Asatur əmisinin ildə-iki ildə bir dəfə Moskvadan Bakıya gələndə ona hədiyyə
gətirdiyi iri bir qutu rəngli karandaşlar idi. Bəzən elə bil ki, o karandaşların
qırmızısı, yaşılı, sarısı, çəhrayısı, narıncısı on iki, on üç, on dörd yaşlı bir qız
uşağının – Roza üçün həmişəlik bir keçmişdə qalmış təmiz, sadəlövh, səmimi
hisslərinin, həyəcanlarının rənginə çevrilirdi və həmin vaxtlar Rozaya elə gəlirdi ki,
birdən-birə xatirələri bürümüş o qırmızının, o yaşılın, sarının, çəhrayının, narıncının
işıltısında qəribə bir mütəəssirlik, hətta göz yaşı var və belə anlarda Rozanın özünün
gözləri dolurdu, bu gözəl qadın həyatının indi beləcə çiçəkləyən bir çağında heç bir
səbəb olmadan için-için ağlamaq istəyirdi.
Asatur əmi Moskvada tramvay sürürdü və doğma qardaşı, yəni Rozanın atası
vəfat edəndən, Rozanın anası qonşuluqda yaşayan dul azərbaycanlı bərbərə ərə
gedəndən sonra, on üç-on dörd il idi ki, Bakıya gəlmirdi, amma bütün bayramlarda –
Yeni ildə, 8 Martda, 7 Noyabrda, 1 Mayda, Azərbaycanda Sovet hakimiyyəti
qurulması münasibətilə 28 Apreldə, eləcə də hər il ad günündə Rozaya təbrik
açıqcaları göndərirdi və Asatur əmi bütün dünyada yeganə adam idi ki, Rozaya
beləcə təbrik açıqcaları göndərirdi.
Vasili Mitrofanov Əbdül Qafarzadənin adından Roza ilə, necə deyərlər,
danışıqlar aparanda və Roza bu gözəl Moskva səfərinə razılıq verəndə o qırmızının,
yaşılın, sarının, çəhrayının, narıncının o mütəəssir işıltısı bir gecə vaxtı yenə də
xatirələrə dolmuşdu və həmin xatirələrdə Asatur əminin siması Rozanın o uşaqlıq
hissləri, həyəcanları kimi, bir təmizlikdən, paklıqdan xəbər verirdi. Roza Moskvada
Asatur əmiyə mütləq zəng etmək, onunla görüşmək, evinə getmək istəyirdi və bu
barədə Əbdül Qafarzadəyə də demişdi, amma Asatur əminin tramvaysürən olduğunu
deməmişdi, utanmışdı, demişdi ki, əmisi SSRI Ticarət Nazirliyində işləyir; bunu
demişdi və özü öz sözlərindən nigaran qalmışdı, çünki birdən Əbdül Qafarzadə
Ticarət Nazirliyində işləyən o adamı görmək istəyərdi, onunla tanış olmaq
istəyərdi...
Amma Roza nahaq yerə nigaran qalırdı, çünki Əbdül Qafarzadə dünyadakı
rozalara və qeyri-rozalara yaxşı bələd olduğu üçün, sövq-təbii ilə o saat başa düşdü
ki, Roza yalan deyir və öz kefini pozmamaq üçün dərininə getmədi...
O beş gündə o üçotaqlı nömrədən dişardakı həyatı təkcə Vasili Mitrofanovun
zəngləri yada salırdı; Vasili də həmin mehmanxanadakı nömrələrdən birində qalırdı
və hər gün bir dəfə səhər, bir dəfə də axşam zəng eləyirdi: «– Bir şey lazım deyil,
Əbdül Orduxanoviç?» Əbdül Qafarzadəyə nə lazım olacaqdı? – keçənilki o gözəl
yaz günlərində, o üçotaqlı lüks nömrədə Rozadan başqa Əbdül Qafarzadəyə
dünyanın heç bir ləl-cəvahiratı, heç bir şeyi lazım deyildi; amma həmin beşinci
günün axşamı Vasili zəng eləyəndə Əbdül Qafarzadə:
– Ürəyimə kamança düşüb, Vasya... – dedi və bu sözləri elə yanıqlı, elə
ürəkdən dedi ki, Vasili, kişinin səsini heç vaxt beləcə mütəəssir eşitməmişdi.
Əbdül Qafarzadə heç özü də bilmədi necə oldu ki, ürəyi kamança istədi;
adətən, qəmli, kədərli vaxtlarında kamançaya qulaq asardı, amma Moskvadakı o yaz
günlərində Əbdül Qafarzadənin ürəyi də, elə bil, yüz ilin ağacıydı, təzədən
çiçəkləmişdi və kişi dünyanın bütün dərdini-sərini unutmuşdu; amma, hər halda,
görünür, ürəkdə nəsə varmış...
Rozadan fərqli olaraq, Əbdül Qafarzadə heç vaxt o lüks nömrədə çılpaq
gəzmirdi, çarpayıdan qalxan kimi, əyninə paltar geyirdi; Rozanın o ağappaq, sim
kimi tarım çəkilmiş bədəninin müqabilində özü özünün yekə və tüklü qarnından, özü
özünün yaşından həyalanırdı, hətta eşq aləminə, məhəbbət işlərinin bütün
incəliklərinə yaxşı bələd olan Rozanın gülə-gülə, şövqlə, ehtirasla çağırmağına
baxmayaraq, Əbdül Qafarzadə onunla birlikdə duşun altına da girmirdi, gəlib vanna
otağında Rozanı iri Çin məhrabasına bürüyüb qucağına alırdı, çarpayıya aparırdı.
Vasili səhər tezdən Bakıya uçdu və axşam reysi ilə məşhur kamança çalan
Əhməd Şirkərimlə birlikdə Moskvaya qayıtdı, Vnukova aeroportundan taksini
birbaşa Moskva Mərkəzi Bazarına sürdürdü, abşeronlu gülsatanlardan Roza üçün bir
qucaq qönçə qızılgüllər aldı, elə həmin axşam Əhməd Şirkərimi o üşotaqlı lüks
nömrəyə gətirdi və Əbdül Qafarzadə ilə Roza da səliqə ilə geyinib Əhməd
Şirkərimin çalğısına qulaq asdı.
|