İNSAN QAYALAR
("Vətən qayaları,
Vətən daşları” silsiləsindən)
Bir qayaya söykənmişəm,
deyirəm kaş:
Bax beləcə daşa dönəm
yavaş-yavaş.
Taleyimi qayaların taleyinə
bağlayam mən.
Bircə insan düşüncəmi saxlayam mən.
Daş ayaqlı, daş əlli bir insan kimi
Enib daşdan-daşa düşəm.
Qayaların lal dilini başa düşəm.
Onların daş qulağına bir daş atam,
Qayaların keçmişini
qayalara xatırladam,
Deyəm: bir vaxt insan oğlu
insan olub bu qayalar.
İnsanların nərəsindən
doğulub bu qayalar.
Nər igidlər düşmən üstə gedən zaman
Babalar da baş qaldırıb yer altından,
Qaya kimi, -
dayaq olub, yumruq olub,
ox olublar.
Qayadöşlü qəhrəmanlar
qayalıqda yox olublar,
Bu torpağın taleyində o da elə
bir gün idi.
İgidlərin yaşaması daş olmaqla mümkün idi.
Yoxsa onun qismətinə hardan düşə
bu qədər daş!
Danış görüm, a daş qardaş!
Siz nənəmin bacılığı,
Siz babamın qardaşlığı,
Təbiətin səpdiyi bir
zəmi sanım
Bəlkə elə bu daşlığı!
Siz ey qədim əfsanələr
Şerimə yağ, səsimə yağ!
Nə zamansa bu daşlarla
bir dil tapan tapılacaq -
Bu daşların, qayaların
keçmişini oyadacaq,
Ordu-ordu qayalıqlar
insanlığa qayıdacaq.
Bu basılmaz nərlər-ərlər,
Bu qaya sərkərdələr
Onda məni - bir balaca daş əsgəri
qoyar yəqin qoşulmağa bu cərgəyə,
Qayaların keçmişini
qayalara yazdım, deyə.
Onda Vətən sanar məni
Bir balaca Vətən daşı,
Vətən daşı olmayandan
olmaz ölkə vətəndaşı...
Şuşa, 1970
YAZI MASAM
Səninçün darıxdım, ay yazı masam!
Səninçün darıxdım bu dağlar üstə.
Nə qədər qayadan, daşdan da yazsam,
Dincəlmək istədim yarı saralmış,
Yarı nəfəsimdən yanıb qaralmış,
Yarı ağ, səpəli varaqlar üstə.
Balaca, dördbucaq, ağac dünyama
İstədim fikrimi heşan eləyəm,
Bu ağac dünyama,
bu tac dünyama
Sinəmi söykəyib tufan eləyəm.
Min xallı-boyalı mənzərə gördüm.
Kükrəyib çağlamaq istədim.
Susuz və kimsəsiz bir dərə gördüm,
Hönkürüb ağlamaq istədim.
Bir masa axtardım dirsəklənməyə,
Bir qələm axtardım ürəklənməyə.
Masa göstərdilər daşdan yonulu,
Ən nadir, ən ağır ağacdan yonulu,
İstəsəm çiynimə çay bağlardılar
İlham almağa
İstəsəm sinəmə ay bağlardılar,
İlham almağa
Qorxdum: bu aləmə qəlbim susana,
O nəm bucaqdakı dostum qısqana.
Dağlar da ərkimdən inciməz yəqin,
Qayalar masamdan min yol gözəldir.
Yastı qayalara masam deyənin
İlhamı bəlkə də hellənc düzəldir.
Mənim yazı masam - arı pətəyim,
Özüm də, fikrim də min el dolaşır.
Mənim söz çiçəyim, duyğu çiçəyim,
Onda mayalaşır, onda ballaşır.
Şuşa, avqust, 1970
ÇOBAN NƏĞMƏSİ
Nəfəsində dağ havası,
dağ nuru,
Vüqarında qayaların qüruru.
Çəmənlərdir, çiçəklərdir həmdəmin,
Buludlardır, şimşəklərdir həmdəmin.
Məhəbbətin yaylaq kimi -
dağ qəlbi, təmiz.
Gözü duru bulaq kimi
dağ qəlbin təmiz.
Bərəkətin bulud-bulud -
Axarını dağlara tut,
dağ düzlərə tut.
Çoban ömrü ömürlərin uzunu;
Nəğməsi var: "Çoban, qaytar quzunu...”
Dağ neyləyər bu nəğməsiz çağları,
Çoban, qaytar bu dağlara dağları...
1970
DƏRƏ
Bu dərə nə dərin, nə dar dərədir;
Bu dərə qəribə məzar dərədir.
Udur nərələri, qıyları udur,
Gurşad - boğazında bir içim sudur,
Tutub div ədalı ildırımları.
Çiliklər, didiklər sıldırımları.
Baxıram: çay hərdən bükür boynunu,
Dərə boğmağamı sürüyür onu?
Bu dərə nə dərin, nə dar dərədir,
Bura muzey dərə, məzar dərədir.
Qayadan qayaya atılan kəllər
Buraya dirənib, buynuz tökərlər.
Bir uçrum dibində ceyran izləri
Son güman yerinə qısılı qalıb.
Bir qaya döşündə nə vaxtdan bəri
Bir qartal qanadı asılı qalıb.
Ürəyi dolanda təbiət hərdən,
Çəkilib gecələr ağlar burada,
Qasırğa əlindən, tufan əlindən
Qaçırıb dumanı, saxlar burada.
Onda eraların hiddəti yatır.
Doğulub öldüyü müddəti yatır.
Burdan çıxmalıyam uca dağa mən,
Qorxuram qorxumdan qışqırmağa mən;
Birdən nəfəsimi sümürər dərə,
Zirvəyə bir quru cəsəd göndərər.
Bu dərə nə dərin, nə dar dərədir,
Bura muzey dərə, məzar dərədir...
Avqust, 1970
QANADLI QAYALAR
Bir daşmı sıyrılıb qopdu qayadan,
Başı hamarlandı bir şiş qayanın.
Burda qayaları qartal sayanın
Uşaq heyrətinə baş əyir adam.
Burda hər zirvəni zirvə qoruyur,
Qartal gözləriylə baxır qayalar.
Bir gündə neçə yol bir qartal boyu
Alçalır qayalar, qalxır qayalar...
Şuşa, 1970
BULAQ DAŞINDA YAZI
Nəğməsiz dodaqlar bu suyu lillər!
Zirvələr qarından süzür dağ südü;
Əyil duruluğa duru könüllə!
Bir bulaq olubdur bu torpaq südü!
İyun, 1972
SALAM, A ZİRVƏLƏR
Salam, a gədiklər, salam, a dağlar!
Yenə boynunuzu qucmaq istərəm.
Alıb küləyini qoluma, dağlar,
Zirvədən zirvəyə uçmaq istərəm.
Çoxdandır sürmürəm ayaq gəmimi,
Dərəyə susuzam, zirvəyə acam.
Batırıb buluda daş qələmimi
Yağışlı bir nəğmə yazım yamaca!..
Sonra da oxuyum, səsimi yazsın
Qaya sinəsinə mətin qayalar.
Torpaq nəğməsinə qoy qulaq assın
Torpaqda ən möhkəm bitən qayalar.
Zirvəyə qalxdıqca adamı sanki
Günəş yuyundurur nur damarında.
Azacıq uyudur, ətirli, sakit,
Sərin dağ mehinin qanadlarında.
Görünər zirvələr bərabərində
Ağıllar mayakı ağıl zirvələr.
Görünər zirvələr bərabərində
Buluddöş dastanlar, nağıl zirvələr.
Salam, a zirvələr, salam, a dağlar!
Yenə bir qayada göyərdin məni.
Salam, a zirvələr, salam, a dağlar
Yenə bir nəğməlik köyrəldin məni...
İyun, 1970
CIRCIRAMA
Öz sonuncu nəşəsiylə verib baş-başa,
Yapışar da bir ağaca, bir daşa,
Gecənin lal uyğusunu poza-poza,
Tez mürgüyə gedənlərin
yuxusunu poza-poza
Oxuyar, oxuyar, oxuyar cırcırama,
Sonra da əbədi
yuxulayar cırcırama...
Ömrün son çağında nəğmə oxumaq,
Ölüm ayağında nəğmə oxumaq...
Qəribə ömürdür, qəribə ölüm;
Qəribə həyatım, qəribə ömrüm
Bir anın dərdlərə tay olmayıbsa,
Bir ovuc sevincin pay olmayıbsa,
Qonumu-qonşumu harayın niyə -
Çəkib oyatsın ki, "ölürəm”, deyə?!
Beləsə, yaxşıdır cırcıramatək
Nə yaşadım demək, nə öldüm demək;
Sonu əvvəlindən xəbərsiz olan:
Əvvəli sonutək əsərsiz olan
Birisi söyləyər: bixəbər yazıq,
Birisi söyləyər: bəxtəvər yazıq...
İyul, 1970
MÜHACİRİN DƏFTƏRİNƏ YAZILMIŞ XATİRƏ
Qohum da soyuyur, dost da soyuyur,
Gedən unudulur, gedən unutmur.
Qərib ürəyində bir səs uyuyur:
Vətən unudulmur, Vətən unutmur...
Yanvar, 1970
ÇOBAN SƏHƏRİ
Qışlaqda yazılmış şer
Çoban qardaş, bu gün erkən oyat məni,
Dan yerinə bir at çapmaq istəyirəm.
Boz at gətir,
boz dumanda boz at məni
İtirdikcə itik tapmaq istəyirəm.
Səhər-səhər qırovlu mərz - soyuq dodaq,
Öpüm onu - isindirim, isinim bir.
Uzaq üfüq qaşındakı sönən ocaq
Nə zamansa qərib düşən hisslərimdir.
Neçə ildir yollarıma çıxmır turac,
Nəğməsinə, çəhliminə yadam indi.
Dan yerinin işığını qulac-qulac
İstəyirəm bu yollara atam indi.
Canavar da görməmişəm çoxdan bəri
Qurd ürəyi varmı indi - yeyən ola.
Bu düzlərdən ov təzdirən ləpirləri
Bir canavar yuvasına düyən ola.
Şehli düzdək biçdirəcək qırçın-qırçın,
Çoban bilər nə tamdadır payız südü.
Elə bil ki, çiynindəki yapıncının
Ətəyidir dalısınca gələn sürü.
Cilov çəkim, ilgəhləsin qoşa sətrim,
Gün dəyəndə şum buğlanar, xumarlanar.
Təbimizdə sən olmasan - torpaq ətri,
Şerimiz də bir baxışdan buxarlanar.
Hər səhərin öz addımı, öz gəlişi
Neçə ildir pəncərəmdə eyni səhər,
Nolar bəşər - deyirəm ki, sözgəlişi, -
Nəğmələri, ilhamları eynilətsələr.
Xoşum gəldi o xallı, göydəmir atdan,
Dəli olsun, yalmanına yata bilim.
Bir səhəri başlayım mən üfüq altdan,
Bir axşamı gün batanda bata bilim.
Dekabr, 1970
FƏHLƏ SÜFRƏSİ
Bir qayanın dibindəcə süfrə açdıq,
Kürsümüz də, mizimiz də daşdan idi.
"Nə sağlığa, nə də yağlı sözə acdıq,
Kim dahidi, kim uludu”- deyilmədi.
Arpa çayı hazır idi içilməyə-
İki zirvə qədəh kimi üz-üzəydi.
Deyilmədi: üzülməyən, keçilməyən
Dağları kim keçəndi, kim üzəndi...
Dağ kəvəri gözümüzdən yaş axıtdı,
Xallı kəklik yaldan baxıb
qah-qah çəkdi.
Dağ keçisi dərəyə daş dığırlatdı,
Mırıq yarğan
tozanaqda bir ah çəkdi.
Fəhlə üçün bunlar adi xəbərlərdi,
Gəvəzə söz-söhbətiydi yal-yamacın.
Mənim üçün cığırlar ağ nəğmələrdi,
Onun üçün tozlu çəhlim- özü açıb.
Qayaları qaval kimi çaldı külək.
Haradasa ildırım da nərildədi.
Boz qayanın yarığından boz kürkünü
Tez gətirib,
Kürəyimə atıb dedi:
Burda dolu daş qanadır,
Burda yağış misi dəlir.
O üfüqün qaşındakı qaşqabaqlı
Qara bulud ağlamalı, gülməlidir...
Buludlar ağ mərmisini səpdi yerə,
Fəhlə nəhəng bir qayanı kürk elədi,
O, nə adi heyrətini sərdi yerə
Nə də böyük qorxmazlığı görk elədi.
Təbiətin nağılına qulaq asdı:
Nənəsinin nağılı kimi,
Xumarlandı.
İldırımı sanki dağlar lentə yazdı.
Bir dil tapdı göyün eşqi,
yerin andı.
Dadlı idi yağış altda naharımız,
Dumanı da, çiskini də əziz paydı,
Bu naharda-min ətirli baharımız,
Küləyi də, pencəri də əmlik əti.
Bir fəhləyə qonaq oldum Arpaçayda,
Bu süfrənin hər tikəsi bərəkətdi...
1973
DAĞLARA ÇAĞIRIŞ
Musa Yaquba
Şair, qayalara, dağlara söykən,
Mənim də arzumu sən yaşat barı.
Özülsüz şöhrətlər uçurub sökən
Zamana bənzəyən dağ gürşadları
Min il də göz yumub, açsa ağzını
Yuya bilməyəcək daş xınasını.
Bu dağlar özəyi, özülü möhkəm,
Şair, qayalara, dağlara söykən!
Ən ağır anında dağlarla danış,
Ən ali loğmandır o müdrik qoca.
Nə qədər, nə qədər qaysaqlanmamış
Dərdlər tullasan da dərə boyunca
Dağ çayı çökdürüb çay daşlarına,
Duruldub bənzədər göz yaşlarına.
Dağlar öz hökmündə güzəştsiz, ötkəm,
Şair, qayalara, dağlara söykən!
Dağlar sevgisində bir ulu ata,
Dağlar ərköyünlər atası deyil.
Kimini xurcuntək çiyninə atan,
Hellənc sapandına qoyub kimini
Dərələr dibinə atası deyil.
Hətta ildırımlar dağlar çibini,
Dağların qorxusu, xətası deyil.
İgidlər çiynini dağlara tikər,
Şair, qayalara, dağlara söykən!
Başından sağsağan əskik olmayan
Donqar qoz ağacı pıçıldasa da:
Gözündə gözəllər əksi olmayan
Lil bulaq qıyqacı pıçıldasa da,
Söykənmə möhrəsi nəm divarlara,
Söykənmə özülü kəm divarlara.
Ucalıq enilməz dağlar var ikən,
Dağlara söykənən dağlara söykən!
Dağlar dağ oyadan qıyıltıları
Bütün dərələrə paylaya bilir.
Ötəri, itəri vıyıltıları
Bəzən min illərlə quylaya bilir.
Beləcə səbr öyrən o dağ əmindən.
Yorulub, beziksən dağ aləmindən,
Mənim ünvanıma qarğıyıb, söylən,
Məni bu dağlara çağırıb, söylə:
Buyur, qayalara, dağlara söykən!
Şair, qayalara, dağlara söykən!
1972
QARABAĞ DÜZÜ
Bu gün mənim dənizimdi
Qarabağ düzü,
Kəhər atın tozanağı "Doqquzuncu bal”.
Bu gün mənim söz düzümdü-
Qarabağ düzü.
Sonsuzluğun son xəttini gəzirdi xəyal.
Bu gün mənim çörəyimdi
Qarabağ düzü.
Hər əlimdə Kür çayından
bir bıçaq arxım,
Yoğuracaq, yapacaqdım gecə-gündüzü.
Sonra halal süfrələrə doğrayacaqdım.
Bu gün mənim tariximdi
Qarabağ düzü.
Bu gün üfüq bir üzükdü-Nizami qaşlı.
Geri fırlan, yer kürrəsi, zamandan küsüb
Nüşabənin kəcavəsi təpədən aşdı...
Qədim Bərdə Tərtər üstən
yüz körpü atdı,
Xəyanətin adlaması böyük ar oldu.
Hanı tarix cünglərinə yubanmış atlı?-
Azərbaycan qadınından
hökmdar oldu!
Bu gün mənim bir düz kürsüm-
Qarabağ düzü.
Qanadımdı qız alqışı,
qadın alqışı.
Bu gün mənim bacım Gülsüm-
Qarabağ düzü.
Doluxsunma, bir də gələr, şair qardaşın,
Bu gün bizə quzu kəsdi Hüseyn qağa,
Baxdım: sürü adaları göy düzdə üzür.
Bir dostluğa, bir süfrəyə, bir eşqə sığan,
Bir dənizdi yer üzünün Qarabağ düzü...
İyun, 1972
QOCA ƏMİM BELƏ DEDİ
Kitabdan da, yaddaşdan da qayadı möhkəm,
Bu qayalar sirr bilir ki, - Loğman da bilmir.
Bir haray çək,
bu dağlarda qalsın harayın.
Könül səsi könüllərdə yaşamalıdır.
Kişilərdən haray qalıb,
ad qalıb bizə.
Nakişinin səpdiyi dən qum bitiribdi.
Sən arabir bu yerlərə özgə kimi gəl.
Qərib yolçu donunda gəl.
Şər qarışanda:
Gör atının yedəyini tutan olurmu!
Varsa, demək, bu yerlərdə kişilər ölmür.
Qoca əmin bu dağlardan dağ ömrü alıb.
Sən arabir bu yerlərə söz almağa gəl;
Söz çəkməyə sözdən düzgün tərəzi yoxsa,
Etibarın "para”, "bütün” çeşidi yoxsa,
Dul arvadın çəpərinə daş atan yoxsa,
"Üç ayaqlı uşaqlara” sataşan yoxsa,
Bulaqları övlad kimi qoruyan varsa,
Dağ çayını nənə kimi qoruyan varsa,
Demək, burda qoca əmin yaşayır hələ,
Demək, burda kişi ölür, kişilik ölmür...
24 dekabr, 1973
DƏNİZÇİ DÜNYASI
Dənizçinin kayutunu şəkillər bəzər,
İşıq saçar qadınların
şəkil gülüşü.
O, sulardan küsər bəlkə, dənizdən bezər,
Nə yaxşı ki, baxtına bu şəkillər düşüb...
Hər baxışın təbəssümü duru su ona,
Enib sudan tor da atar ona baxışlar.
Kimisinin yönü ona, duruşu ona,
Kimisinin sədəf dişi bir hiss bağışlar.
Bu baxışlar, bu duruşlar od olar gecə,
Dənizçinin yatağına qor dolar gecə.
Birisinin xəyalını qucar qucaqlar,
Birisiylə görüşünü sabaha saxlar.
Bu, gözəllik şahının da öz dərdi varmış,
Bu qadınlar şəkildə də qısqanc olarmış.
Birisinin umusundan yanar, kayutu,
Birisinin küsüsündən donar kayutu.
Bu baxışlar, bu duruşlar od olar gecə,
Dənizçinin yatağına qor dolar gecə.
Yuxusuna həmdəm olar incə bir qılıq,
Dənizdən bir külək əsər ətirli, ilıq.
Yuxusunda qağayılar qağıldaşarlar,
Yuxusunda qağayılar qadınlaşarlar.
Bir-birinə tullayarlar dənizdə onu,
Çıxararlar, quylayarlar dənizdə onu.
Ləpələr də soyuyarlar, buza dönərlər,
Pəncərədə buz hörüklü qıza dönərlər.
O, tor atar,
Hörük-hörük saçlar düşər toruna.
Yarı balıq əllər düşər toruna,
Bellər düşər, nələr düşər...toruna.
Üzlər düşər,
gözlər düşər toruna...
Birdən onu qısqanarsa sular pərisi,
Gəmimimzi didikləyər, parçalar hirsi,-
Hamımızı balıqlara qatıb aparar...
Bircə cavan dənizçini qatıb aparar...
Dənizçinin yatağına qor düşər gecə,
Bir nəfəsin qarmağına ilişər gecə.
O dartılıb, bir quruya çırpınmaq istər,
Bir ümidə, bir qayğıya bürünmək istər...
Görən onlar bir-birini haçan tapacaq?-
Dəniz yuya, qum quruda bu qətiyyəti.
Dalğaların qanadında bir oğlan oyaq,
Sahillərin qumluğunda bir qız həsrəti...
Lənkəran, 1969
ÖMRÜMÜN SUAYRICINDA
Uçuq bir dəhnədən suyu sovulmuş,
Dəni qarışqaya, quşa yem olmuş,
Üzündə səhərin sazaqlı yeli,
Qabarlı çiynində təpcəkli beli,
Qıçları çirməli
bir suçu kimi
Elə yol gedirəm fikirli, tutqun.
Dayanıb, yorunuq bir yolçu kimi,
Deyirəm çox nahaq bu yolu tutdum.
Hansı bir bərənin gülləsindəsə
Özümü ayıltmaq istəyəcəyəm.
Ömrümün hansı bir pilləsindəsə
Geriyə qayıtmaq istəyəcəyəm,
Ata buyruğundan ilk qədəm alan,
Ana yuxusunda uçurumu qalan
O cavan kim idi?
Sevdiyi qızgilin bağı yanından
Keçəndə qəfildən duruxan cavan?
Əyilib o bağa gizli daş atan,
Mürgülü quşları vaxtsız oyadan
O cavan kim idi?
Nə idi o çağrış, nə idi o səs,
"Hey-hey” cavabını gözləmədi bəs?
Ağ yollar atını çapdı dalınca,
Dolular atını çapdı dalınca.
Buludlar üzünü qanatdı qəfil,
Gürşadlar saçına əl atdı qəfil.
Hər qaya dibində bir bacı bulaq
Sızladı: nə zaman o qayıdacaq?...
Yollar ətəkləyib, qayalar çapıb,
O gənci axtarıb, o gənci tapıb,
Rəddini, izini yollardan yığıb,
Dağlara yönəlib, dağlara çıxıb
Yenə ürgəmizi çullayacağam.
Qıçıma dolaşan bəd niyyətləri,
İlğım qiyafəli bədiyyətləri
Dərənin dibinə tullayacağam.
Sinib boz ürgənin bulud yalına,
Çapıb gedəcəyəm bulud dalına.
Arabir ucuna şimşək dolayan
Qardaş dəyanətli dəyənəyimi,
Məni görən kimi quyruq bulayan,
Əlimi yalayan
boz əniyimi-
Mürgüdən oyatmaq istəyəcəyəm,
Onlara qayıtmaq istəyəcəyəm.
İki göz baxacaq bir boz çadırdan,
İki iz çıxacaq bir boz çadırdan.
Biri: vədəxilaf bir sona izi,
Biri: iz izləyən qaynana izi...
Dolaşa-dolaşa biri-birinə,
O izlər bulaqdan dönəcək yenə.
Mən məhəl qoymadan bunlara qəti
Pay da istəmədən ilk məhəbbəti
Qovaram atımı şıltaqlığıma,
Gəncliyi haqlayan uşaqlığıma.
Quzulu yamaclar dağıdar çəni,
Təpələr çiyninə götürüb məni,
Qaldırar havaya qartal sayağı,
Sonra da uçurdar üzü aşağı.
Qayadan qayaya pırıldatdığım
Kəkliklər sevinməz bu gəlişimdən.
Daşını dərəyə yuvarlatdığım
Gədiklər sevinməz bu gəlişimdən...
Yenə dərələrə sığışmaram mən,
Yenə zirvələrə yığışmaram mən.
Yenə ayağımdan atıb yolları
Qanad istəyərəm bu günə sarı...
1970
BABƏK QILINCI
Ballada
I
Bir alim dilindən qopdu qığılcım,
Oyandı hövlnak daş qərinələr!
Deyirlər tapılıb Babək qılıncı,
Muştuluq paylayın, qarı nənələr!
Bayram edəsiyəm bu günü, bayram
Ox-qılınc nəvəsi silahlar ilə.
Bir yaraq önündə büdpərəst ollam,
Vuruşa-vuruşa allahlar ilə.
Gəlin, a zirvələr qayalı-yallı,
Qol-qola yapışaq, yaman çağımdı.
Yallı gedəsiyəm, bir dəli yallı,
Araz dəsmalımdı,
Kür şallağımdı.
Riyalar, xülyalar bazarı açan
Minbərlər şəninə
vay salmağım var,
Nəsimi, Nəimi məzarınacan
Yerin qulağına hay salmağım var:
Deyirlər tapılıb Babək qılıncı!
Ölümlə əlbəyaxa hansı nər idi
Qanlar daşqınından götürdü onu.
Özünə ərköyün övlad elədi
Babəkin yaralı, qılınc oğlunu.
Neçə il qaldılar mağaralarda,
Bir qoca daşların yeminə döndü.
Qılınc qəzəbindən daş zağalarda
Qayalar əriyib dəmirə döndü.
Babək, qılıncını yerə atanda
Min igid qolunu torpağa atdı.
Bəlkə də bu torpaq bir od qatında
Onları əridib, qılınc yaratdı.
II
Min qoldan güc alan bir ağıl gücü
Zülmətlər deşəsi yol olmalıydı.
Yaşamaq istəyən bu torpaq üçün
Qol-ağıl, ağıl da qol olmalıydı.
Deyirlər tapılıb Babək qılıncı!
Babək harayının nidalarını
Top kimi çiynimdə saxlayasıyam,
Babək qılıncının şüarlarını
Raketlər burnuna bağlayasıyam.
Qürurlu qayalar, səs eşidin ki...
Bir az da şux dursun heykəl qalalar.
Xəndəklər, yarğanlar dərinləşin ki,
Qorxuram qorxaqlar evsiz qalalar.
Bu nə titrəmələr, bu nə əsmələr...
Bu necə haraydı, bu necə səsdi.
Bütün çeynəmələr, bütün kəsmələr,
Bütün tapdamalar səsini kəsdi.
Gözü qarnındalar hörümçək kimi
Çəkilib qısıldı dib bucaqlara.
Yalançı dilləri gəmircək kimi
Çəkib tapşırıram
daş bıçaqlara.
III
Bir qoca dəmirçi qılınc naxışlar,
Yazar dəstəyinə: "İnsan vüqarı”.
Bəzən bir igidə onu bağışlar,
Bəzən də yüz yaşlı göyçək bir qarı
Alar bu təltifi, sıxar döşünə.
Oğul qeyrətinə baş əyməyənin,
Ana hörmətinə baş əyməyənin
Çəkib bu qılıncı, çaxar döşünə.
İndi bir gözədə bulaq nazlanıb,
Bir dodaq üzünü püləmək istər.
Bir dərə dolusu quş pərvazlanıb
Dünyanı nəğməyə bələmək istər.
Bir səhər bu səslə qalxdım yerimdən,
Günəşlə bir baxdım yer kürəsinə.
Bu səhər dünyada tuş olmadım mən
Ağlayan, sızlayan ana səsinə.
IV
Ana qayğısıyla başıma əl çək.
Xeyirxah əməllər, işıq əməllər.
Qayada bitəcək, daşda bitəcək
Bir toxum yetirib bərəkət əllər.
Ütük bir hiyləgər irişdi üzdə,
Xəbər yabısına çubuğu dindi...
Sərhəd qoşunları, üfüqümüzdə
Qalxan bir dağa da söykənin indi!
Deyirlər tapılıb Babək qılıncı,
Babəki son anda udan qaraltı
Dirilib bir qara duman gəzəcək,
Babəki son anda satan qaraltı,
Bu səsi boğmağa güman gəzəcək.
Deyirlər tapılıb Babək qılıncı,
Bu, yalan olsa da doğrulmalıdır!
Onun döyüşdüyü dağ xıncım-xıncım,
Dərə qıyma-qıyma doğranmalıdır!
Babəkin məzarı düzəndi, dağdı,
Bu dağlar, düzənlər qazılsın gərək.
Babək heykəlinə Babəkin adı
Babək qılıncıyla yazılsın gərək!
Sentyabr-oktyabr, 1970
UCA DAĞ
Bu qədər ucalıq, nəyə gərəkmiş?
Meşə qurşağından, çay topuğundan.
Gərəksiz yüksəliş ölüm deməkmiş,
Niyə ayrı düşüb daş-torpağından!
Göyü papaq kimi geyib başına,
Üstündən qartallar ötüşə bilmir.
Çılpaq qayasına, soyuq daşına
Yağışlı dumanlar yetişə bilmir.
Ələsən, bir ovuc torpağı yoxdur,
Yaşar baş daşından betər, deyirəm.
Özündən savayı dayağı yoxdur,
Bir fit səsindən də büdrər, deyirəm.
1970
MƏN GETSƏM...
Mən getsəm, dərələr, dağlar qalacaq,
Meşələr, çəmənlər, bağlar qalacaq.
Buludlar qalacaq, ağlar qalacaq,
Ey mənim yaşamaq, yazmaq həvəsim,
Tək səni özümlə aparasıyam.
Dırman zirvələrə yel qanadında,
Tökül dənizlərə sel qanadında.
Bir ağı, bayatı, dil qanadında
Bir yuva qurmasan, ay quru səsim,
Mən səni özümlə aparasıyam.
Hələ uçqunlara indi tanışam,
Sınıq qayaları yamamamışam.
Hələ nə ərkim var belə danışam:
Vətən daşlarına düşməyən əksim,
Mən səni özümlə aparasıyam.
Nə düz deməmisən, düzünü de ki...
Bu torpaq ağartsın üzünü, de ki...
Dünyaya sonuncu sözünü de ki,
Ey qardaş qələmim, desəm-deməsəm,
Mən səni özümlə aparasıyam.
1969-1970
YERLƏR
Əgər ad sırası gəzsək həyatda,
Əgər yer davası düşsə şerdə,
Alqışlar altında Nizami ata
Keçib oturacaq birinci yerdə.
Birinci bir olur,
Xoşbəxtmi deyək?!
Ondan irəlidə yer yoxsa,
nə pis...
Birinci ildırım, birinci şimşək,
Birinci yüksəyə kəsilər həris.
Qorxun, birincilər, əli yalından!
Əli yalınların dili yaraqdır.
İkinci "hay verib”, qaçsa dalından,
Birinci birinci yıxılacaqdır.
Haxlar birincini ikinci addım,
İkinci dağ olar,
ikinci dərə.
Saxlar birincini ikinci addım
Bəzən qalxan üçün ikincilərə.
Özü doğulmamış yeri doğulan, -
Ayağı torpağa, əli dəmirə
dəyməyən,
dibçəkdə bir şitil oğlan
Bəzən mismarlanar birinci yerə.
Zaman çəkicinin möhürü yoxsa,
Zaman kəlbətini dişini zağlar.
Zaman, gözlüyünü gözünə taxsa,
Yerlər də yerində oturacaqlar.
Mənə pay yetişməz bu paylaşmada,
Vaxt hanı yer ovu dalınca düşüm.
Dərə adlamada,
zirvə aşmada
Əsgər yürüşüdür mənim yürüşüm.
Vətən sevgisində birinci ada
Birinci çatmağa pay yetər mənə.
Burda birincilik:
Vətən yolunda
Birinci ölməyi öyrədər mənə!
1972
PAYIZ NİDASI
Sənə də qar yağdı, güvəndiyim dağ!
Sən də örənidin, a yaşıl yamac!
Sən niyə dinməzsən, qaragöz bulaq,
Sən niyə kövrəksən, ürəyini aç!
Lal dili verilib bu dəli çaya,
Bir cavan yasından gələnlər kimi.
Sən niyə tutqunsan, xınalı qaya,
Ər yolu gözləyən gəlinlər kimi.
Mən insan bilmişəm qayanı-dağı,
Təbiət yaşamır təbiət üçün.
Mən ki, bu yerlərə gəlmirəm axı,
Sadəcə təəssüf, ya heyrət üçün.
Mənim də baxtımda bu mənzərələr
Fəsil fırlatmağa girəvə tapır.
Mənim də daş əlim qılınc dərələr,
Mənim də boş əlim
Daş zirvə tapır.
Hanı o başıma dolu yağdıran
Başı ayağından yalın olanlar.
Hanı kürəyinə tərif yaxdıran
Dili dabanından qalın olanlar.
Tökər budağından çürük qozları,
Ərinti, çürüntü bişirər payız.
Yayın bürküsündə qalxan tozları
Dağlardan aşağı düşürər payız.
Dağlar payızlıdır, mən titrək əlli,
Gözümdə gör nələr canlandı, nələr...
Dağlar baharlıdır, mən əqidəli,
Yaşasın baş-başa bu abidələr!
1970
SƏBRİMDƏN İNADIMA MƏKTUB
Hər "səfər” qabağı mənimlə danış,
Məni məşvərətçi baba bil hərdən.
Nənələr duası yola salmamış
İgidlər az dönüb uzaq səfərdən.
Arabir ürəyin hökmündən daşın,
Arabir sən ağlın ağzını ara.
Təmkinsiz əllərdən atılan daşın
Özü də pillədir çox azğınlara.
Çəkməli olsan da boş yüyənləri,
Üzəngi basmaqdan özünü saxla,
Bircə şapalağa dəyməyənləri
Hörmətə mindirmə bir şapalaqla.
Yüyrək demirlər ki, hər qaçağana,
Qaçmayan qovulsa yaxşıdı bəlkə.
Ömrümüz qibtəçi bir sağsağana,
Səhvimiz sağsağan yaşıdı bəlkə.
Nə pisdir - şaxəli budaq içində
Qalasan bir tənha yarpaq kimi sən;
Sən hərdən bir dəstə uşaq içində
Oyuncaq itirən uşaq kimisən:
Əli cibindələr - göz yayındırar,
Gözü cibindələr - güman hədəfi.
Ov var, ovçusundan iz yayındırar,
Ovçu var, ovundan bərəni qəfil.
Hər gün də nur umma nur dağlarından,
Ömürdə hər günü düzməzlər sapa,
Çox "qızıl baxtların” budaqlarından
Qızıl yarpaqları tökəcək sabah.
Tozanaq görmüşük boş inadları,
İnad çöp daşıyır - caynaq olanda.
Çəkər zoğlarını torpaq qatları -
İnad, inamına qaynaq olanda.
İnamdan göyərsə bir dağdır inad -
Bu, Vətən dağıdır söykən ki, söykən!
Nə uçan quşunun dalınca daş at,
Nə qopan daşının dalınca söylən...
...Mənim inamımın sərhəddini çək! -
... "Ədalət sərhəddi!” -
Belə səs gəlir.
Bir burda geriyə çəkilməyəcək.
Bu inad, səbirsiz Vətən əsgərim...
Oktyabr, 1972
BİR DÖVLƏTƏM
Bir balaca dövlətəm mən,
Bir balaca ərazim var.
Yer kürəsi qonşusunda
sınanmağa,
Planetlər məclisində tanınmağa
ərizəm var.
Bir balaca dövlətəm mən.
Bayrağımdı bir ağ kağız,
bir də qələm...
Bundan artıq
bəzək-boya istəmirəm.
Bir balaca dövlətəm mən.
Bu ürəkdən o ürəyə
sərhəd xəttim.
Ən nizami qoşunumdur
Əzəl sevgim, son nifrətim.
Bir balaca dövlətəm mən.
Qələmimdir hərbi nazir,
Paytaxtımdır yazı masam.
Nizaminin, Füzulinin qoşunları
Keçə bilməz gələcəyə,
Yol üstündə bu balaca -
Şer - sənət dövlətimlə
mən olmasam.
1969
ARPAÇAY NƏĞMƏSİ
Bir dərənin inadına qıfıl vurulur,
Xəyalların aynasında bir göl durulur.
Bir çay axır babaların arzularından,
Bir çay axır qəlbimizin xəritəsinə.
Nəğmə qopur dərələrin boz sularından,
Qayalar da qulaq bağlar ötkəm səsinə:
Arpaçayı aşıb daşar,
Qayalarla qucaqlaşar.
Yedəklənər yavaş-yavaş,
Düzə enər yavaş-yavaş.
Bir çay axır həsrətinə ilğımların da,
Qum altında yol gözləyir çiçək gülüşü
Bir vaxt dəli şimşək kimi o da harındı,
İndi gurşad qanadları yanına düşüb.
Kəklik səsi, qartal səsi qarışıb ona,
Sarı sünbül saçaqları çöldə müntəzir.
Bir çay axır boz səhranın dodaqlarına,
Bir çay nəğmə dildə gəzir, dodaqda gəzir.
Arpaçay, dekabr, 1973
YURDUMUZUN QIZLARI (Nəğmə)
Zəhmətiniz üz ağlığı,
Yurdumuzun gül qızları.
Başımızın ucalığı,
Bəxtimizin ulduzları.
Nur daşıyar bu ağ yollar,
Bələdçisi mərd oğullar.
Təbəssümlər "uğur” - deyər.
"Məni səslə, çağır” - deyər...
Ön sırada gedənlərin
Qismətinə alqış düşər.
Qəhrəmanlar nəfəsindən
Qayalara naxış düşər.
Bir saz kimi çalaq Kürü,
Bu düzlərə nəğmə qoşaq.
Ağ işıqlı Mil-Muğanda
Gül qızlara nəğmə qoşaq.
İyul, 1973
GÖZLƏRİ YOL ÇƏKƏN ANA MAHNISI (Nəğmə)
Bir ana, boynunu burmaqdan yorulmaz.
Daş heykəl yanında durmaqdan yorulmaz.
Gözləri yolları yormaqdan yorulmaz.
Bu necə bahardı?
Bu necə qışdı bəs? -
Ay - Günəş gətirər,
Qar-yağış gətirər,
Muştuluq gətirməz.
Bu Vətən yolunda dağ aşan oğullar,
Torpaqdan göyərib daşlaşan oğullar.
Əbədi şöhrətə yaraşan oğullar,
Səhərlər sizsiniz üfüqdə işıq-zər.
Gecələr gözünüz ulduzdan gülümsər.
Həsrətim yollara dil səpər, gül səpər...
Bu necə bahardı?
Bu necə qışdı bəs? -
Ay - Günəş gətirər,
Qar-yağış gətirər,
Muştuluq gətirməz.
1973
DAĞ YADDAŞINDA YAZI
Birisini çıxartdılar uca bir yerə,
Tez aşağı daş hellətdi:
- Baxın, hardayam!..
O birisi özü qalxdı bu yüksəklərə,
Heç demədi: "Mən də varam,
Mən də burdayam”.
... Yazı gördüm dağ döşündə -
Dağ yaddaşında:
Birincinin helləncinin
çuxuru qalıb;
İkincinin ayağının cığırı qalıb...
1973
BAKININ GECƏSİ (Nəğmə)
Bakının gecəsi,
Məhəbbət çətirli
Gilavar gülablı,
Gilavar ətirli.
Bu gecə nə gözəl,
Nə sirli-soraqlı...
Bu gecə, bu gecə
Kəhkəşan daraqlı...
Bu nurlu gecələr -
Qəlbimdə gecələr.
Səhərlər üfüqdən Günəşə köç elər.
Analar laylalı, körpələr uyğulu,
Xəzəri nəğməli,
Xəzrisi duyğulu...
Bakının gecəsi - nur adlı bir dəniz -
Sahili eşqimiz,
Mayakı qəlbimiz...
1973
KÜLƏKLƏR
Döy qapımı, döy qapımı, Müşfiq küləyi,
Əli Kərim qasırğası, qır pəncərəmi.
Bir uçurumdan asılıdır şair urəyi,
Bir sal daşa söykəmişəm pəncələrimi.
Küləklərin laylasında uşaq kimiyəm,
Küləklərin nənnisində oynayır əlim.
Küləklərə qısılıram nənəmdir, - deyə,
Saçlarını oxşamaqdan doymayır əlim.
Torpağımız alov quşlu, şimşək cüyürlü,
Bu torpağı qucmaq üçün dumanlaşaydım,
Əyiləydim bir div kimi: Arazlı, Kürlü
Dərələri sümürəydim, tufanlaşaydım.
Qarşı gələn səd küləyi, sərhəd küləyi
Mənim külək qoşunlarım əzərdi onda.
Eh, nə bilim, bir dəlisov Məmməd küləyi
Bəlkə sizin dalınızca əsərdi onda...
1971
QƏFİL
Bir haray yuxuma güllə boşaltdı,
Bir duyğu səsiymiş oyadan məni, -
Qəfil bir səksəkə qoynuna atdı,
Oyatdı bir qəfil yuxudan məni.
Qəfil baş kəsmələr, qəfil asmalar,
Qəfil qasırğalar yadıma düşdü.
Qəfil hökmləri qəfil yazmalar,
Naqəfil darğalar yadıma düşdü.
Qəfil oyanışlar, vuruşlar ki, var!
Yaman qəfilləri qəlbim unutdu.
Qəfil hücumlara qəti duruşlar
Gözümə təsəlli pərdəsi tutdu.
Qəfil üsullarla çoxdan tanışıq,
Bəzən bu cürəti yada vermişik.
Qacarı qəfildən yaxalamışıq,
Nəbini qəfildən bada vermişik.
Qəfil muştuluqlar az çıxar yola,
Qəfil xoş xəbəri haxla deyiblər.
Qəfil bir sevgini dağdan qolayla
Sonra dalısınca ağla, deyiblər.
Bu torpaq əsrlər qaranlığında
Qəfil nur dağları dikəldib axı!
Bu torpaq qədimlər toranlığında
Nadan sürüsü də kökəldib axı!
Qəfil təzadların sıçrayış yeri-
Gah zülmətli olub, bu yer, gah işıq.
Biz hələ bu yerdə qəfilliklərin
Əsil damarını axtarmamışıq...
1970
ÜFÜQ
Nə yaxşı,
əl çatmazdır üfüq;
Nə yaxşı,
arzularca
Ucalmazdır üfüq.
Nə yaxşı
əl çatmazdır üfüq.
Nə qədər xəyalımız
səs qapır, söz tapır,
çapır, çapır...
Düz keçir, dağ aşır,
yetmir ona.
Nə yaxşı yetmir ona.
Nə yaxşı,
əl çatmazdır üfüq.
Nə yaxşı, arzular kamına
alçalmazdır üfüq.
Nə yaxşı, istəyin
boz quma əkiləni var.
Ümidin çarmıxa çəkiləni var.
Nə yaxşı, sən varsan,
üfüqdən o yankı həyatım.
Üfüqdən o yanda-
Söz yetməz heyhatım...
1970
|