Əsas » Məqalə » Azərbaycan ədəbiyyatı |
YENİ TƏYİNATLAR:
«DÜNYA SİVİLİZASİYASINDA AZƏRBAYCANIN YERİNİ MƏDƏNİYYƏTİMİZ MÜƏYYƏNLƏŞDİRƏCƏK» Əfəndiyev Elçin İlyas oğlu (Elçin) 1943-cü ildə Bakı şəhərində anadan olmuşdu. M.Ə.Rəsulzadə adına BDU-nun (keçmiş ADU) filologiya fakültəsini və Azərbaycan EA-nın ədəbiyyat nəzəriyyəsi üzrə aspiranturasını bitirmişdir. Filologiya elmləri namizədi, əməkdar incəsənət xadimidir. Nizami adına Ədəbiyyat İnstitutunda baş elmi işçi, Azərbaycan Yazıçılar İttifaqının idarə heyətinin katibi, Xaricdə Yaşayan Həmvətənlərlə Azərbaycan Mədəni Əlaqələr Cəmiyyəti - «Vətən» Cəmiyyəti idarə heyətinin sədri vəzifələrində işləmişdir. Yazıçıdır, 30-dan çox kitabın, o cümlədən 2 elmi monoqrafiyamn, 300-dən çox elmi məqalənin müəllifidir. Əsərləri bir çox dünya xalqlarının dillərinə tərcümə edilmiş, nəşr olunmuşdur. Evlidir, 3 övladı var. -Elçin müəllim, yeni təyinat münasibətilə Sizi təbrik edirik. Hökumət işi oxucuların əlindən onların sevimli yazıçısını almayacaq ki? -Çox sağ olun. Yazıçı kimdir? Öz yazısı-pozusu ilə xalqa xidmət edən vətəndaş. Amma indi xalqımızın elə bir günüdür ki, yazı ilə edilən xidməti əyani xidmətlə birləşdirmək imkanı varsa, bundan istifadə etmək lazımdır. Bu gün mədəniyyətə, maarifə əməli kömək lazımdır. Qədim və zəngin milli ənənələrimiz olan bu sahələrdə onları bərqərar və inkişaf etdirmək gərəkdir. Bu sahələr dərin böhran içərisindədir. Bu böhran yalnız hansısa nazirliyin yaxşı və ya pis işləməsilə şərtlənmir. (Onlar yaxşı işləməlidir - bu öz yerində!) Respublikada bütün sahələrdə - iqtisadiyyatda da, hərbi sahədə də böhran mövcuddur və təbii ki, bu, mədəniyyətə də, sosial sahələrə də ciddi təsir göstərir. Mədəniyyət, maarif maddi ehtiyac burulğanındadır. Digər tərəfdən də, mənəvi sərvətlərin yaradıcıları maddi ehtiyaclarını həll etmək, özlərini sənətdə, elmdə ifadə etmək üçün xarici ölkələrə gedirlər. Bu da bu sahələrin zəifləməsi prosesini gücləndirir. Bunlarla ciddi məşğul olmaq lazımdır. Mənim şübhəm yoxdur ki, torpaqlarımız da qaytarılacaq, maddi sərvətlərimizə layiq güzəran da görəcəyik, amma mənəvi sahədə itkilərin - mədəniyyət adamlarının çıxıb getmələri ənənələrin dağılması - bunların ağrısını sonra çəkəcəyik. Bunları sonradan əvəz etmək çox çətin olacaq. Ona görə də mən bu təklifi qəbul etdim və bu vəzifəyə gəldim. Mən bu təklifin məsuliyyətini yaxşı başa düşürdüm. İşin içərisinə girdikcə də bu mənim üçün əyaniləşir. Çalışacağam ki, heç bir siyasi fəaliyyətə uymadan Azərbaycan mədəniyyətinə, maarifinə xidmət edim. Bu da, gurultulu səslənməsin, xalqa xidmətdir. İndi prezident seçkilərini uğurla başa çatdırmalıyıq. Bu seçki cəmiyyətə, nəhayət ki, sabitlik gətirəcək son dərəcə mühüm amildir. Sabitlik şəraitində isə humanitar sahənin problemləri ilə məşğul olmaq daha asan olacaq. -Humanitar sahənin problemləri deyəndə, yəqin ki, təkcə mədəniyyət və maarifin problemləri nəzərdə tutulmur. -Mən bu sahələri bir-birindən ayırmaq istəməzdim. Yəni mədəniyyət, maarif, səhiyyə, sosial sahələr, idman, elm - dediyim böhran bunların hamısında özünü göstərir. Mədəniyyət deyəndə də mən yalnız Mədəniyyət Nazirliyinin funksiyalarına aid problemləri nəzərdə tutmuram. Ümumiyyətlə, söhbət Azərbaycan idrakından və mənəviyyatından gedir. Bu sahələrin hər birində ciddi və əsaslı islahatlar aparılmasına nail olmalıyıq. Ellikcə əl-ələ verib çalışmalıyıq ki, Azərbaycan mədəniyyətində bir dirçəliş mərhələsi yaradaq. Azərbaycan mədəniyyətinin inkişafı və onun dünya miqyasında təbliği paralel aparılmalıdır. Bunlar hamısı bir məqsədə, Azəraycan dövlətçiliyinin bərqərar olunmasına, möhkəmlənməsinə xidmət edir. Bu da dünya sivilizasiyasında müstəqil Azərbaycanın yerini müəyyənləşdirən çox mühüm amillərdəndir. -Çox sağ olun, bu sahədə Sizə və həmfikir bilib arxalandığınız bütün ziyalılara uğurlar arzulayırıq. «RESPUBLİKA»
1993. | |
Baxış: 521 | |
Bütün rəylər: 0 | |